«Уй талабга жавоб бермайди» — Самарқандликлар «арзон» уйлар қимматлаб кетганидан норози бўлмоқда

Шу тарзда энди уй эгаларининг ойига 1,5 миллион сўмдан, имтиёзли давр тугагач, ойига 4,5 миллион сўмдан тўлов қилиб боришлари керак.

Видео: Youtube

 Видео: Mover (tas-ix)

«Масалан, мен ёлғиз онаман, боқувчим йўқ, икки фарзандим бор, биттасини боғчага беришдан ўзга иложим йўқ. 1 500 000 сўм уй учун ойлик тўлов, болалар боғчаси учун 800 000 тўлов, яшаш ҳам керак. Ўзи Ўзбекистонда бунча харажатларни кўтара оладиган ойлик маош борми? Нимани ўйлаб арзонлаштирилган уйлар нархини кўтаришяпти», дейди «Обод маскан»да яшовчилардан бири.

Аҳоли норози бўлаётган жиҳатлардан бири, бугун хусусий тадбиркорлар уй қуриш учун ерни сотиб олади, у ерда жойлашган ҳовлиларни ҳам сотиб олиб, хонадонларни кўчиради. Харидор эътироз билдирмаслиги учун уй сифатига ҳам жавоб беради. Бу ерда эса, ер тўлиқ давлат томонидан берилган. Қурувчи снос учун бошқа қурувчилар қатори катта маблағ сарфламаган. Яна қатор имтиёзлар бўлгани ҳолда ҳам айтилганидан тор, ҳам айрим хонадонларда сифатсиз ҳам деярли бозор нархи билан тенг «арзон» уй таклиф қилмоқда. Шу масала барчани қийнамоқда», – дейди Ш.Болтаева.

Аҳоли вакилларининг айтишича, асосан уйга эҳтиёжманд оилалар истиқомат қилувчи бу маҳаллада дастлаб давлатга қарашли болалар боғчаси иш бошлаган, фуқаролар фарзандларини бера бошлаган. Аммо бир-икки ҳафта ўтиб бу хусусий боғча ва унинг нархи бир миллион сўмлиги маълум бўлган. Табиийки, шусиз ҳам ойига 1 500 000 сўм уй учун тўлов қиладиган оилалар бунча пулга фарзандини боғчага бера олмайди.

Ўта қиммат хусусий боғчанинг айнан мана шу ҳудудда қурилиши кимнинг ташаббуси билан амалга ошгани номаълум. Бугунги ҳолат шуки, аксарият оилалар ёки фарзандини қаровсиз қолдириб ишга кетади ёки эр-хотиндан бири ишидан воз кечади. Ҳар ҳолда оладиган ойлиги икки фарзанднинг боғча пулига етади ёки йўқ. Бугун болалар боғчасининг бир ойлик нархи бир бола учун 800 000 сўмга туширилган. Аммо оилаларнинг бунга ҳам қурби етмаяпти.

12 июнь куни аҳолининг қурилиш корхонаси вакиллари билан учрашуви оғзаки айтишувга айланиб кетгач, аҳоли билан вилоят, шаҳар ҳокимлиги, қурилиш корхонаси, мана шу қурилишларнинг буюртмачиси бўлган Самарқанд вилоят «Шаҳар қурилиш инвест» ва банк вакиллари иштирокида масалага ойдинлик киритиш режалаштирилганди. Аммо белгиланган вақтда барча аҳоли тўплангани ҳолда бирор бир масъул ташкилот вакили келмади. Саволлар эса очиқ қолмоқда.

Гапнинг индаллоси шуки «Обод маскан» маҳалласи аҳли икки нарсадан қатъиян норози: уй нархи ошиб кетгани ва уйлар сифатсиз қурилгани.

Бундан икки ой олдин ҳам шу маскандаги 21-уйда яшовчилар таҳририятимизга мурожаат қилганида бориб, мазкур уй пойдевори ёрилиб кетганига гувоҳ бўлгандик. Аҳвол шу даражада эдики, ёриқдан пойдеворнинг нариги томони кўринарди. Андиша қилибми, фуқаролар ўшанда ҳолатни ёритмай туришимизни илтимос қилишганди. Аммо вақт ўтиб уй қурилишидаги камчиликлар юзага чиқавергани бугун кўпчиликни норози қилмоқда. Эндиликда уйлардаги муҳандис-коммуникация тармоқлари, эшик ва деразалар, деворлардаги камчиликлар, уй ён-атрофининг чўкиши ҳам кўпчиликни хавотирга солган.

Kun.uz воқеалар ривожини кузатиб боради ва юзага келган муаммо юзасидан тегишли идоралардан изоҳ кутиб қолади.

Анвар МУСТАФОҚУЛОВ,
Kun.uz мухбири.

PS: Жорий йилнинг 9 июнь куни сайтимиз орқали Самарқанднинг бошқа бир ҳудудида ҳам худди шунга ўхшаш - «Самарқанддаги «Ёшлар уйи» нархи нега қиммат бўлиб кетди — Уй эгалари бошқалар учун ҳам тўлайдими?» сарлавҳали мақола эълон қилинган эди. Афсуски, бу юзасидан ҳеч қандай муносабат билдирилмади. Афтидан, тегишли идоралар аҳолининг ҳақли эътирозларини сукут сақлаб «енгиб ўтмоқчи» шекилли.