Халқаро кинофестивалда Гран при ютган «Чой» фильми бугун бепул намойиш этилади 

Бугун, 1 июль куни соат 18.00 да Алишер Навоий номидаги кинотеатрда режиссёр Шокир Холиқовнинг «Чой» номли қисқа метражли фильми тақдимот маросими ўтказилади.

“Ўзбеккино” Миллий агентлиги матбуот хизматининг Kun.uz’га маълум қилишича, мазкур фильм намойиши кўпчилик кино мухлисларининг талаб ва таклифларига кўра, 30 июнь – «Ёшлар куни» муносабати билан бепул ўтказилмоқда.

«Чой» қисқа метражли фильми танқидчилар, ўзбек ва жаҳон кино мухлислари диққатини ўзига жалб қилди. Хусусан, фильм 14-25 май кунлари Франциянинг Канн шаҳрида бўлиб ўтган халқаро кинофестивалнинг «International Festival Entr'2 marches» қисқа метражли фильмлар фестивалида Гран прига сазовор бўлди. 

Бундан аввал, 2018 йилда илк бор «PROlogue» кинофестивалида намойиш этилган фильм фестивалнинг «Энг яхши фильми» деб ҳам топилганди.

Бугун киносаройда шунингдек, “Ўзбеккино” Миллий агентлиги буюртмасига асосан суратга олинган режиссёр Севара Ҳалимованинг «Кулча» номли қисқа метражли фильми ҳамда «Зумраша» болалар юмористик журналининг тақдимоти ҳам ўтказилади.