Apple арзон iPhone ишлаб чиқаради: Face ID'дан воз кечилган, лекин бармоқ изи сканери бор

Apple арзон iPhone ишлаб чиқаришни режалаштирмоқда.

Бир вақтнинг ўзида Хитой нашрларида iPhone'нинг маҳаллий бозор учун мўлжалланган махсус модели ишлаб чиқарилиши мумкинлиги ҳақида хабарлар тарқалди. Янгилик смартфонлар бозорида мутлақ ҳукмронликни сақлаб келаётган Oppo ва Huawei билан тенг шароитда рақобатлашиш имконини бериши керак.

Манбаларнинг хабарларига кўра, Apple арзонлаштириладиган янги маҳсулотида Face ID'дан воз кечмоқчи. Бунинг ўрнига ишлаб чиқарувчилар бармоқ изи сканери Touch ID'ни қайтариш фикрида. Датчик орқа панелга ёки экраннинг ўзига ўрнатилиши мумкин.

Шу каби янгиликлар ишончли кўринади, чунки Apple аллақачон хитойликлар учун iPhone'нинг алоҳида моделларини тақдим этган. Масалан, маҳаллий бозорда сотувга чиққан iPhone XS ва iPhone XR моделлари икки жисмоний SIM-картани қўллаб-қувватлайди, аммо дунёнинг бошқа ўлкалари фойдаланувчиларида фақатгина eSIM + SIM шаклидаги имконият мавжуд.

Агар iPhone'нинг Face ID'сиз модели тайёрланаётгани рост бўлса, шунда ҳам у янги йилдан олдин харидорлар эътиборига ҳавола этилмайди. Келаётган кузда Apple мавжуд моделларнинг давомчиларини тақдим қилади, холос. Уларнинг барчаси экранда юзни таниш орқали қулфланиш имкониятига эга.

Яқиндагина компания янги процессорли нисбатан арзонроқ iPhone модели устида ишлаётгани ҳақида хабарлар тарқалганди. Бу айнан Face ID'сиз вариант бўлиши ҳам мумкин.