Пиллачилик тармоғида чуқур қайта ишлашни ривожлантириш бўйича қўшимча чора-тадбирлар тўғрисида президент қарори қабул қилинди

Пиллачилик тармоғида чуқур қайта ишлашни ривожлантириш бўйича қўшимча чора-тадбирлар тўғрисида Ўзбекистон Президентининг қарори қабул қилинди.

Қарор билан пиллачилик кластерини ташкил этишда корхоналарнинг иқтисодий фаолият турлари рўйхати, пиллачилик кластерларини ташкил этадиган “Ўзбекипаксаноат” уюшмаси таркибидаги корхоналар рўйхати, 2019-2025 йилларда “Ўзбекипаксаноат” уюшмаси таркибидаги корхоналар томонидан ипак маҳсулотлари ишлаб чиқариш ва экспорт қилиш бўйича прогноз параметрлари, 2019-2021 йилларда пиллачилик тармоғида чуқур қайта ишлашни ташкил этиш асосида амалга ошириладиган инвестиция лойиҳалари рўйхати ҳамда пиллачилик соҳасини янада ривожлантириш бўйича амалий чора- тадбирлар режаси маъқулланди.

Ҳужжатда белгиланишича, 

2022 йил 1 августга қадар пиллачилик тармоғи корхоналарига (уларнинг ваколатли вакилларига) 6-иловага мувофиқ рўйхат бўйича маҳсулотларни АҚШ, Европа Иттифоқи давлатлари ва Туркияга экспорт килишда ҳаво ва темир йўллари транспортида ташиш харажатларининг 50 фоизигача микдорини давлат бюджети маблағлари ҳисобидан компенсация қилишга субсидиялар такдим этилади;

“Ўзбекипаксаноат” уюшмаси таркибига кирувчи корхоналар томонидан пилла етиштириш бўйича тузилган шартнома асосида пилла етиштирувчи субъектларга (уларнинг розилиги билан) аванс ҳисобига кейинчалик тайёрланадиган пилла учун тўлов суммасига ўтказган ҳолда етказиб берилган тут ипак қурти уруғи ва пилла етиштириш учун зарур бошқа моддий-техника ресурслари ҳамда тут кўчатлари қиймати товарларни (ишларни, хизматларни) реализация қилиш обороти деб ҳисобланмайди;

лизинг асосида қишлоқ хўжалиги техникасини харид қилиш, минерал ўғитлар, уруғлик, ўсимликларни кимёвий ҳимоя қилиш воситалари ва бошқа материал ресурсларини етказиб бериш бўйича фермер хўжаликлари учун назарда тутилган шартлар ҳамда тартиб пиллачилик тармоғи корхоналарига ҳам татбиқ этилади;

2020 йил 1 январдан бошлаб тут дарахтларини гайриқонуний равишда кесганлик, шикастлантирганлик ёки йўқ қилганлик учун ундирилган жарималарнинг 50 фоизи ҳуқуқбузарлик содир этилган ҳудудда янги тут кўчатларини экиш учун мақсадли йўналтирилади;

Ўзбекистон Президентининг 2018 йил 29 ноябрдаги “Маҳаллий ишлаб чиқарувчиларнинг экспорт салоҳиятини янада рағбатлантириш чора-тадбирлари тўғрисида”ги фармони 1-бандида назарда тутилган имтиёзлар 2021 йил 1 январга қадар хом ипак (ТИФ ТН коди 5002) ва ипак момиғи (ТИФ ТН коди 5003) маҳсулотларига ҳам татбиқ этилади. Бунда, имтиёзларни қўллаш натижасида бўшайдиган маблағлар ишлаб чиқаришни модернизация қилиш, шу жумладан технологик ускуналар сотиб олиш учун мақсадли тарзда йўналтирилади;

Ўзбекистон Президентининг 2018 йил 4 декабрдаги “Республикада пиллачилик тармоғини жадал ривожлантиришни қўллаб-қувватлашга доир қўшимча чора-тадбирлар тўғрисида”ги қарори 5-бандида назарда тутилган компенсация тақдим этиш тартиби лойиҳалар қиймати ва сонидан қатъи назар пилла етиштиришни, шу жумладан пилла етиштирувчи фермер хўжаликлари ва касаначиларга бўнак беришни, улар билан якуний ҳисоб-китобларни амалга оширишни ҳамда қурилиш ва реконструкция ишларини молиялаштириш мақсадлари учун ҳам татбиқ этилади ва мазкур тартибнинг амал қилиш муддати 2023 йил 1 январга қадар узайтирилади.

“Ўзбекипаксаноат” уюшмаси:

ҳудудларда “Ўзбекипаксаноат” уюшмаси таркибига кирувчи корхоналар томонидан тут кўчатларининг экилиши, ипак қурти уруғи ва пилла етиштириш, пиллани чуқур қайта ишлаш, ипак, ипак момиғи ва ипакдан чуқур қайта ишланган маҳсулотлар экспортини амалга ошириш, инвестицияларни жалб этиш ва янги иш ўринларини яратиш бўйича прогноз кўрсаткичларининг тўлиқ бажарилишини мунтазам равишда мониторинг қилиб боради;

тут кўчатларини экиш, ипак куртини парваришлаш иншоотларини куриш, пилла етиштириш ва уни чуқур қайта ишлашни ташкил қилиш, ипак маҳсулотлари экспортини амалга ошириш ва янги иш ўринлари яратиш бўйича белгиланган кўрсаткичларни таъминлашда сусткашликка йўл қўяётган “Ўзбекипаксаноат” уюшмаси таркибига кирувчи корхоналар бўйича уларга тақдим этилган имтиёзларни қайта кўриб чиқиш юзасидан Вазирлар Маҳкамасига таклифлар киритиб боради;

тирик пилла етиштирувчилардан етиштирилган тирик пиллани сотиб олиш (уларнинг тирик пилла етиштириш хизмати) нархини 2020 йилдан камида 20 фоизга, 2021 йилдан яна камида 10 фоизга ошириш чораларини кўради.

Қорақалпогистон Республикаси Вазирлар Кенгаши ва вилоят ҳокимликлари 2020 йил 1 январга қадар фермер ва деҳкон хўжаликларига, қишлоқ хўжалиги ҳамда пахтачилик-тўқимачилик кластерларига ер участкаларини ажратиш тўғрисидаги қарорларда ҳамда ер участкалари ижараси шартномалари (шу жумладан олдин қабул қилинган қарорлар ва тузилган шартномаларда) “Ўзбекипаксаноат” уюшмаси таркибидаги корхоналарнинг мазкур ер участкаларидаги қишлоқ хўжалиги экин майдонлари четида ва йўл бўйида жойлашган тут дарахтларидан пилла етиштириш учун озуқа сифатида фойдаланиш ҳуқуқи назарда тутилишини таъминлайди.

Ипакчилик илмий-тадқиқот институти тасарруфида Фарғона, Самарқанд, Хоразм, Қашқадарё ва Сурхондарё вилоятларида наслли ипак курти уруғи етиштирувчи муассасалари ташкил этилади.

Фарғона, Самарқанд, Хоразм, Қашқадарё ва Сурхондарё вилоятлари ҳокимликлари Ўзбекистон Республикаси Давлат активларини бошқариш агентлиги билан биргаликда ушбу муассасаларга давлатга тегишли бўш турган биноларда ижара ҳақининг “ноль” ставкасини белгилаган ҳолда зарур майдонларни ажратади.

Экология ва атроф муҳитни муҳофаза қилиш давлат қўмитаси “Ўзбекипаксаноат” уюшмаси билан биргаликда:

икки ой муддатда тут дарахтларини ғайриқонуний равишда кесганлик, шикастлантирганлик ёки йўқ қилганлик учун ундирилган жарималарнинг 50 фоизи ҳуқуқбузарлик содир этилган ҳудудда янги тут кўчатларини экиш учун мақсадли йўналтириш тартибини ишлаб чиқсин ва тасдиқлаш учун Вазирлар Маҳкамасига киритади;

2019 йил 1 ноябрга қадар қишлоқ хўжалиги экинлари далалари четидаги ва йўл бўйидаги тут дарахтларини хатловдан ўтказиб, қатъий ҳисобини юритиш ва уларни ғайриқонуний равишда кесиш, шикастлантириш ёки йўқ қилиш ҳолатларининг олдини олиш чораларини кўради.

Инновацион ривожланиш вазирлиги Молия вазирлиги ва “Ўзбекипаксаноат” уюшмаси билан биргаликда 2019 йил 1 декабрга қадар давлат бюджети маблағлари ҳисобидан Ипакчилик илмий-тадқиқот институтида “Тут ипак қурти экологияси ва кимёвий заҳарланиш профилактикаси” лабораториясини ташкил этади.

2022 йил 1 августга қадар “Ўзбекипаксаноат” уюшмаси таркибидаги корхоналар томонидан ипак қурти уруғларини, истисно тариқасида, “божхона ҳудудидан ташқарида қайта ишлаш” божхона режимига жойлаштиришга рухсат берилади ҳамда олиб чиқилиши натижасида тайёрланган пиллаларни республика ҳудудига олиб киришда божхона тўловларидан (божхона йиғимларидан ташқари) озод этилади.