Туркия Москвада чиқиндидан энергия ишлаб чиқарувчи завод қуради

Туркиянинг Yenigün қурилиш компанияси Москвада чиқиндидан энергия ишлаб чиқарувчи завод қуради, деб хабар берди Анадолу агентлиги.

2 август куни Yenigün ва Россиянинг AGC-1 компаниялари ўртасида бу борадаги тегишли шартнома имзоланган.

Лойиҳанинг биринчи босқичи 2022 йилда якунланади.

Yenigün компаниясининг ижрочи директори Фикрет Йенигюн Россияда чиқиндини йўқ қилувчи заводларда чиқинди ёқиш орқали энергия ишлаб чиқаришга қизиқиш ўсаётганини билдирди.

Унинг сўзларига кўра, қаттиқ маиший чиқиндиларни термик йўқ қилиш бўйича генерация объектлари лойиҳаларини амалга ошириш экологик нуқтаи назардан муҳим ҳисобланади.