Россияда дронлардан ташланувчи ёнғинга қарши 250 килограммлик авиабомба ишлаб чиқилмоқда

“Кронштадт” компанияси ва Россиянинг бир қатор бошқа корхоналари ёнғинларга  қарши 250 кглик авиабомбани яратиш устида ишлашмоқда. Бу бомбани дронлардан ёнғин ўчоқларига ташлаш таклиф қилинган. Бу ҳақда МАКС авиасалонида компания бош директори Сергей Богатиков маълум қилди. 

Богатиковнинг таъкидлашича, ёнғин ўчоғининг кенгаймаслигини (локаллаштириш) таъминлайдиган бомба 500 кглик вариантда ишлаб чиқилган, ҳозирда у компания дронларига мослаштирилиб, 250 кглик кўринишга келтирилмоқда.

Мутахассиснинг фикрича, ёнғинларга қарши курашда асосий вазифа ёнғин ўчоғини аниқлаб, унинг жойини маълум қилиш ва у ерга келиб, жойни дронларда суратга олиб, ёнғинни энди бошланаётган вақтда локаллаштиришга уриниб кўришдан иборат. Янги восита ўзидан кукунли ўт ўчиргични акс эттириб, 500 квадрат метрдан каттароқ жойда ишлайди.

“Кронштадт” узоқ масофаларга учувчи дронлар, улар учун борт қурилмалари ишлаб чиқиш билан шуғулланади.