Россия Интерполдан МРБ агенти деб аталаётган Смоленковнинг қаерда эканлигини аниқлаб беришни сўради 

Россия Интерполдан ОАВда Кремль маъмуриятининг собиқ ходими Олег Смоленков МРБ агенти эканлиги ҳақидаги хабарлар пайдо бўлганидан сўнг, унинг қаерда эканлигини аниқлаб беришни сўради.

Бу ҳақда Россия ТИВ расмий вакили Мария Захарова маълум қилди.

Унинг сўзларига кўра, Смоленков бир неча йил аввал оиласи билан хорижий давлат ҳудудида ғойиб бўлган. 

"Икки йилдан кейин эса Америка ОАВ у АҚШ ҳудудида эканлигини ёзмоқда. Бу ўз-ўзидан, тегишли процессуал процедуралар доирасида текширув ўтказилишини талаб қилади. Шу боис Интерпол олдига хориж фуқаросининг йўқолиб қолиши ва унинг Қўшма Штатлар ҳудудида эканлиги бўйича саволлар қўйилди", деди у.

Эслатиб ўтамиз, аввалроқ CNN Америка махсус хизматлари 2017 йилда Россиядан ўзларининг қимматли агентини олиб чиқиб кетишга мажбур бўлганлигини хабар қилганди.

"Коммерсантъ" газетасининг маълумот беришича, Олег Смоленков CNN айтаётган ўша қимматли агентдир. Нашрнинг ёзишича, Смоленков илгари Россия президенти маъмуриятида ишлаган. У 2017 йилда оиласи билан Черногорияга дам олгани кетганидан сўнг ғойиб бўлган.