Австралияда яна қулупнайлар ичидан игналар чиқмоқда

Австралиянинг Виктория штати полицияси супермаркетларда сотиб олинган қулупнайлар ичидан игналар чиқиш ҳолатларини текширмоқда. Бу ҳақда The Age газетаси хабар берди.

Ана шундай ҳолатга дуч келган аёллардан бирининг айтишича, у тортга қўшиш учун сотиб олган қулупнай ичидан игна чиққан.

"Жойимда қотиб қолдим, кўзларимга ишонмасдим. Иккита болам қўлларидаги қулупнайларни энди ейишмоқчи эди. Яхшиямки, игна қўлимдаги қулупнай ичидан чиқди", — деди у.

Худди шундай ҳолат икки ҳафта илгари ҳам юз берган.

Ўтган йил сентябрда Австралия полицияси қулупнайлар ичидан тикув игналари чиқиш ҳолатлари юз берганидан сўнг федерал текширув олиб борганди. Игналар шунингдек, банан ва олмалар ичидан ҳам чиққанди.

Полиция ушбу жиноятни содир этган аёлни қўлга олган, у кейинчалик гаров эвазига озодликка чиқарилганди.