Ўзбекистонлик қиз Туркия парламенти депутатининг уйида ўзини отиб қўйди. Марҳумнинг акаси полиция хулосасидан шубҳада

Ўзбекистонлик 23 ёшли Нодира Қодирова Туркия пойтахти Анқара шаҳрида парламент депутатининг уйида ўзини отиб қўйди.

Полициянинг дастлабки хулосасига кўра, у депутатга тегишли тўппонча билан ўз жонига қасд қилган. Қизнинг акаси эса депутат воқеадан олдин синглисига нисбатан жинсий зўравонлик қилган бўлиши мумкинлигини айтмоқда.

Ҳодиса 23 сентябрь куни Туркияда ҳукмрон партия депутати, истеъфодаги генерал Ширин Уналнинг хонадонида рўй берган. Марҳумнинг ёнидан ўқотар қурол топилган, унинг ўлими шаҳардаги касалхоналардан бирида қайд этилган.

Маълум бўлишича, Нодира Қодирова парламент аъзосининг уйида бир йилдан буён хизматчилик қилаётган, сиёсатчининг бемор хотинига қараётган бўлган.

Полиция ҳодиса вақтида Ширин Унал, унинг хотини, қизи ва бошқа бир хизматчи уйда бўлганини аниқлади. Расмий ахборотда айтилган бошқа бир хизматчи ҳам ўзбекистонлик бўлиши мумкин – ОАВ маълумотига кўра, уй бекасини парваришлаш билан Қодировадан ташқари яна бир Ўзбекистон фуқароси шуғулланиб келган.

Университетга кириш орзусидаги қизнинг ўз жонига қасд қилишига ҳеч қандай сабаб йўқ эди

Марҳумнинг акаси Муҳаммадали Қодировнинг «Сўзчи» газетаси мухбири билан суҳбатда айтишича, синглиси воқеадан бир кун олдин айтган сўзлари билан Лайло исмли дугонасини хавотирга солган.

«Жуда ёмон ишлар бўляпти. Акамнинг кўзига қандай қарайман? Ўлишни хоҳлаяпман», – деб айтган у телефондаги суҳбатда.

Шунингдек, Муҳаммадали синглисининг ўз жонига қасд қилишга ҳеч қандай сабаб бўлмаганини таъкидлади. Унга кўра, қиз яқин кунларда университетга кириш учун ўқув курсига бора бошлашни режалаштирган эди.

«Билишимизча, Нодира соат 20:48да депутатнинг тўппончаси билан юрагига ўқ узган. Унинг ҳаётини сақлаб қола олишмаган – ўлим соат 21:50да қайд этилган.

Синглим 4 йилдан буён Туркияда яшаётган эди. Иккаламиз ҳам муаммосиз яшаб келаётгандик. Унинг суициди бизни шокка туширди», – дейди марҳумнинг акаси.

Ўзбекистон Ташқи ишлар вазирлиги берган маълумотга кўра, мамлакатнинг Туркиядаги элчихонаси Консуллик бўлими вазиятни назоратга олган. Жасад 25 сентябрь куни Анқара-Истанбул-Тошкент йўналиши билан учган самолётда ватанга юборилган.

«Унинг қичқириши, эшикни уриши эшитилиб турарди»

Нодиранинг акаси Муҳаммадали ҳуқуқни муҳофаза қилувчи органнинг дастлабки ўрганишлар хулосасига шубҳаси борлигини айтди.

«Суд тиббий-экспертизаси жуда ҳам қисқа вақт ичида ўтказилгани шубҳали», – деб таъкидлади у.

Қодиров RS FM радиосига берган интервьюсида воқеага оид бошқа тафсилотларни ҳам гапириб берди.

«Ҳодиса соат 20:48да бўлган. Бундан 5 дақиқа олдин Ширин Унал менга қўнғироқ қилганди. У уйдаги қурол йўқолиб қолганини айтди. Унинг гапини синглинг қуролни сенга олиб бориб бермадими, деган маънода тушундим. Лекин кейин синглим қурол билан хона ичкарисидан қулфлаб олганини айтди, шунда гап нимадалигини тушундим. Орқадан синглимнинг бақиргани, эшикни ургани эшитилиб турарди. Бирдан алоқа узилиб қолди. Тезда таксига чиқиб, Чаййўлудаги уйга бордим. Лекин мен йўлдалигимда ўқ отилиб бўлган эди.

Синглим қаердалигини сўрадим. Полиция ходими у касалхонадалигини айтди. Чўнтагимда бир тийин ҳам пулим қолмаганди. Ширин Бей: «У ўзини отди» деди. Полициячидан 50 лира олиб, касалхонага бордим. Мени ичкарига киритишларини сўрадим, унинг битта-ю битта яқин кишисиман, дедим. Отам уни менга омонат қолдирганини айтдим. Шифокор келиб, сабр тилади. Тамом бўлиб бўлгандим, докторнинг оёғига йиқилдим», – деб ҳикоя қилади Муҳаммадали.

Унинг қўшимча қилишича, жасадни Ўзбекистонга юбориш харажатларини депутат тўлаб берган. Айрим ОАВда марҳумни Ўзбекистонга жўнатиш фавқулодда тез, атиги икки кун ичида рўй бергани ҳам шубҳали бўлиши мумкинлиги айтиляпти.

23 ёшли қиз қурол ишлатишни биладими?

Марҳумнинг акаси синглиси қандай қилиб ўқотар қуролни ишлатишни билган бўлиши мумкин, деган саволни ҳам ўртага ташлаган.

«Мен уни яхши билардим. Даволанишига зарурат йўқ эди. Ўзини ўлдирадиган даражада эмасди.

23 ёшли қиз қуролни олиб, уни ўқлаган ва тепкини босган бўлиши мумкин эмас. Бошига эмас, юрак соҳасига ўқ узган», – дейди Қодиров.

Полиция баёнотида эса шундай дейилади: «Ҳодиса жойида ўтказилган дастлабки техник экспертиза суициддан бошқа яна бирор бир воқеа рўй берганини тасдиқламади».

Расмий ахборотда таъкидланишича, ҳолат республика прокурорининг назорати ва топшириқлари асосида ўрганилмоқда. Қизнинг ўз жонига қасд қилиши билан боғлиқ қайдлари ва бошқа далилий ашёлар тергов ҳужжатларига киритилган.

Ширин Унал изоҳ бермаяпти

Туркия Буюк миллат мажлисига Истанбулдан сайланган депутат Ширин Унал амалдаги ҳукмрон партия бўлмиш Адолат ва тараққиёт партияси аъзоси саналади. У ҳозирча мазкур воқеа бўйича бирор изоҳ берганича йўқ.

Сиёсатчининг Twitter’даги саҳифаси анча фаол бўлиб, унда биргина 25 сентябрнинг ўзида ўндан ортиқ твит қолдирилган. У мазкур постларининг аксариятида сайловчиларни ўз партиядоши ҳисобланмиш амалдаги президент Ражаб Тоййиб Эрдўғанга овоз беришга чақирган. Микроблогдаги саҳифасига Туркия президентининг суратини жойлаганидан ҳам у амалдаги давлат раҳбарининг тарафдорларидан эканини билиш мумкин.

Хусусан, Oda TV хабарида эслаб ўтилишича, генерал Унал 2016 йилнинг 15 июлидан 16 июлига ўтар кечаси рўй берган давлат тўнтаришига уриниш вақтида ҳам президент Эрдўғаннинг ёнида бўлгани ҳақида маълумотлар бор.