Қўшимча функционаллар
-
Тунги кўриниш
НАТО Эрон хавфи ортидан ракетага қарши мудофаани кучайтиради
Туркия томон йўналган Эрон ракетаcи уриб туширилган ҳодисадан кейин НАТО ҳарбий раҳбарияти ракетага қарши мудофаа тизимларининг жанговар тайёргарлик даражасини оширади.
Туркиянинг Эрон томонидан ракетадан ўққа тутилганидан сўнг НАТО ракетага қарши мудофаа тизимларини юқори жанговар шайлик ҳолатига ўтказмоқда. Бу ҳақда 5 март, пайшанба куни Шимолий Атлантика алянсининг Европадаги бирлашган қуролли кучлари марказий штаби матбуот котиби, полковник Мартин О’Доннелл маълум қилди.
Туркия ҳарбийлари 4 март куни Эрон ҳудудидан учирилган ракета тўхтатиб қолинганини маълум қилди. У Шарқий Ўрта Ер денгизида жойлаштирилган НАТОнинг ҳаво ҳужумидан ва ракета ҳужумидан мудофаа тизимлари томонидан йўқ қилинган. Ракета парчаларидан бири Туркиянинг Ҳатай вилоятидаги Дўртйўл тумани ҳудудига тушган. Туркия Мудофаа вазирлиги билдиришича, ҳеч ким жабрланмаган.
О’Доннеллнинг таъкидлашича, ракета 10 дақиқадан кам вақт ичида аниқланган ва уриб туширилган. У кескинлашув фонида минтақага қўшимча ракетага қарши мудофаа тизимлари кўчириладими-йўқми, бу ҳақда аниқлик киритмади.
Бундан олдин НАТО матбуот котиби Элисон Ҳарт алянс Эроннинг Туркия томон ракета учирганини ва Теҳроннинг бутун минтақа бўйлаб тартибсиз ҳужумларини қоралашини айтган эди. Шу билан бирга, АҚШ мудофаа вазири Пит Ҳегсет таъкидлашича, Эрондан Туркия ҳаво ҳудуди томон учирилган баллистик ракетанинг йўқ қилиниши Шимолий Атлантика шартномасининг жамоавий мудофаа тамойилини белгилаб берувчи 5-моддасини қўллашга олиб келади, деб ҳисоблаш учун асос йўқ.
Анқара Эронга қарши урушда расман бетарафликни сақлаб турибди ва можарони дипломатик йўл билан ҳал этишга чақирмоқда. Ракета ҳодисасидан кейин Туркия ҳокимияти мамлакатга қарши қаратилган ҳар қандай душман ҳаракатларга жавоб бериш ҳуқуқини ўзида сақлаб қолишини билдирди.
Баёнотда шундай дейилади: «Ҳудудимиз ва ҳаво маконимизни ҳимоя қилиш учун зарур бўлган барча чоралар қатъий ва иккиланмасдан амалга оширилади».
Туркияда Америка қўшинлари ҳам жойлашган: НАТОнинг асосий Инжирлиқ авиабазасида тахминан 1500 нафар АҚШ ҳарбий хизматчиси бор. Вашингтон маълумотига кўра, айнан шу база Эрон ҳужумининг нишони бўлган.
Шу билан бирга, Эрон бу ҳужумни инкор этмоқда. Теҳрон таъкидлашича, мамлакат қуролли кучлари Туркиянинг, «қўшни ва дўст давлат» сифатидаги суверенитетини ҳурмат қилади.
