Халқаро енгил атлетика федерациялари уюшмаси номи ва логотипи ўзгаради

Халқаро енгил атлетика федерациялари уюшмаси (IAAF) конгресси уюшма номи ва логотипи ўзгаришини тасдиқлади.

Қатар пойтахти Доҳада енгил атлетика бўйича 27 сентябрдан 6 октябргача ўтадиган жаҳон чемпионатидан кейин ташкилот янги WA - World Athletics номи билан фаолият юритади.  

“Мен ўзимни таниганимдан, 2003 йилда IAAF кенгаши аъзоси бўлганимдан бери мендан қайси ташкилотда ишлашимни сўрашганда менга ҳар сафар бу нималигини тушунтириш учун 3-4 дақиқа кетарди. Янги бренд устида пухта иш олиб борилди. Янги бренд ҳали қўлланмаётганига қарамай, IAAF’дан кўра анча таниқлироқ бўлмоқда”, деб айтган IAAF президенти Себастьян Коу.

Уюшма логотипи дизайни учта асосий элементдан ташкил топган: W – тинчлик, шунингдек, ғалабани нишонлаётган спортчи қўлини; А – енгил атлетика, югуришга тайёрланаётган спортчини ифодалайди, элементлар устидаги ёй эса енгил атлетиканинг бирлашган ҳамжамиятини билдиради. Логотипда доимо олға интилишни ифодалайдиган югуриш йўлакчаси ҳам бор.

Ташкилотнинг ребрендинг жараёни 2018 йил январда бошланган. У билан бирга IAAF’нинг 100 йилдан кўпроқ вақт мавжуд бўлган логотипи ўзгарган.