Шу йилнинг 5 сентябрь куни соат тахминан 01:00 дан 04:00 гача бўлган вақт оралиғида хусусий тадбиркор А.К.га тегишли бўлган, Наманган шаҳар 4-кичик туманда жойлашган телефон аппаратларини таъмирлаш устахонасига номаълум шахс ойнани синдириб кирган.
Ўзбекистон Республикаси ИИВ Жамоатчилик ва оммавий ахборот воситалари билан алоқалар бошқармаси хабарига кўра, у таъмирлаш учун топширилган 46 дона ҳар хил турдаги телефон аппаратлари, бир қанча телефон аксессуарлари ва эҳтиёт қисмлари, “Canon I sensys 3110” русумли принтер, таъмирлаш ускуналари ҳамда 24 дона сим-карталарни ўғирлаб кетган.
Кўрилган тезкор чоралар натижасида, ушбу жиноятни 1989 йилда туғилган Наманган шаҳрида яшовчи А.Р. содир этганлиги аниқланиб ушланган. А.Р.нинг яшаш хонадонидан ўғирланган буюмлар далилий ашё сифатида олинган.
Ҳолат юзасидан Ўзбекистон Республикаси Жиноят кодексининг 169-моддаси (Ўғрилик) 2-қисми билан жиноят иши қўзғатилиб, ҳозирда тергов ҳаракатлари олиб борилмоқда.
