Kun.uz’нинг маҳаллий ҳокимликлар ва бошқа давлат идоралари раҳбарлари билан суҳбатлари давом этади. Сайтнинг навбатдаги суҳбатдоши Тошкент вилояти ҳокими Рустам Холматов бўлди.
Ҳоким билан суҳбатимиз жойларда Тошкент вилояти аҳолисини қийнаб келаётган турли масалалар, хусусан, канализация муаммолари, ҳудудларда кўпгина ишлаб чиқариш корхоналарининг тўла қувват билан ишламаётгани, аҳолининг уй-жойга муҳтож қатламини уй-жой билан таъминлаш, шунингдек, Тошкент вилояти ҳудудидан чиқарилиб, Тошкент шаҳар бошқарувига ўтган ҳудудлардаги ҳужжат ишлари, туризмни ривожлантириш ҳамда бошқа масалалар ҳақида кечди.
«Ишлаб чиқариш корхоналарининг ёпилиб кетишига, аксарият ҳолларда бозордаги рақобат сабаб бўлмоқда»
Шу йилнинг 18 сентябрь куни Олий Мажлис Қонунчилик палатасининг спикери иштирокида Халқ депутатлари Тошкент вилояти Кенгашининг сессияси бўлиб ўтди. Сессияда айрим туманлар (Паркент, Оҳангарон, Бўстонлиқ, Бўка, Қуйи Чирчиқ)да тадбиркорлик субъектлари сони ўтган йилгига нисбатан камайгани, фаолият олиб бораётган 798та саноат корхонаси томонидан йиллик қувватига нисбатан 30 фоизгача фойдаланиб келинаётгани кескин танқид остига олинди. Бу камчиликларнинг сабаби, шунингдек, унинг ечимлари бўйича нима ишлар қилинаётгани билан қизиқдик.
Бу борада Рустам Холматов ўз кузатувлари орқали фикрларини ифодалади.
— Яхши биламиз, хусусий тадбиркорлик жадал ривожланмас экан, ижтимоий муаммолар ечими, маҳаллий тушумлар, бандлик масаласида муаммолар келиб чиқаверади.
Бугун Тошкент вилоятида 64 минг кичик тадбиркорлик субъектлари фаолият олиб бормоқда. Шулардан 400га яқини сиз айтганингиздек, кам қувват билан ишлаяпти. 6000га яқини фаолият кўрсатмаётгани ҳам бор гап. Биз вазирлик ва идоралар билан биргаликда буларнинг сабабларини ўрганиб чиқдик.
Ўтган йилнинг 1 сентябрь ҳолатига кўра, 345та янги корхона ишга тушган бўлса, бу йил деярли икки баробар кўпроқ кичик бизнес субьектлари ишга туширилган. Бу албатта бюджетга тушумларни, иш ўринлари сонини оширди, лекин ижтимоий муаммоларни тўла ечди дегани эмас.
Биз корхоналарнинг ёпилиб кетиш сабабларини ўрганиб чиқдик. Унга кўра, айрим тадбиркорларда маблағ етишмовчилиги, айримлари эса бугунги бозор рақобатларига бардош беролмаслик сабаби билан ёпилиб кетмоқда.
Албатта, биз уларга турли томондан ёрдам кўрсатиш устида ишлаяпмиз.
Ўрганишларда яна шу нарса аниқ бўлдики, жойларда 7405та бўш турган бинолар аниқланди.
Биз ҳозирда бу бинолар ва майдонларга инвестициялар киритиш орқали бу йўналишда ҳам катта ўзгаришлар қилишга ҳаракат қиляпмиз.
«Зангиота туманидан Сергели ҳудудига берилган ҳудудларнинг ҳужжатлаштириш ишлари тез орада якунига етади, бу назоратда»
Аввалроқ Тошкент вилоятининг айрим худудлари вилоят тасарруфидан чиқарилиб, Тошкент шаҳар бошқарувига ўтказилган эди. Масалан, Зангиота туманидан Сергели ҳудудига берилган ҳудудлар.
Сайтимизга келган мурожаатларга кўра, ҳудудлар бўйича ҳали ҳануз ҳужжатлаштириш ишларида муаммолар кузатилмоқда ва бундан кўпчилик инсонлар азият чекмоқда. Рустам Холматовдан мазкур ҳужжатлаштириш ишлари қачон тўла ўз ниҳоясига етказилишини сўрадик.
— Юқорида айтганимдек, аввал Тошкент вилоятининг маркази шаҳар ҳудудида эди ва бу ҳолат кейинчалик ҳам кўплаб муаммоларни юзага чиқарди. Шундай муаммоларни ҳал қилиш мақсадида айрим тадбирларни амалга оширишга тўғри келди.
Жумладан, Зангиота туманидан айнан Сергели ҳудудига кириб кетган ерлар бор эди. Бу ҳудуд 428 гектарни ташкил қиларди ва бу ҳудудлар Сергели ҳудудига ўтди.
Ҳозирда икки туман мутасаддилари мазкур ҳолатнинг ҳужжатлаштириш ишлари устида ишлашмоқда. Газ тармоқлари, электр линияларини ва бошқа айрим объектларни кўчириш ишлари ҳам олиб борилмоқда. Бу ишларни тезлаштиришга ҳаракат қиламиз.
Суҳбатни тўлиқ шаклда юқоридаги видео орқали томоша қилишингиз мумкин.
