«Экспресс-хизмат»: Давлат хизматларини кўрсатишда аҳолига яна бир қулайлик яратилди

Давлат хизматлари агентлиги Тошкент шаҳар бошқармаси матбуот хизматининг хабар беришича, мамлакат бўйлаб «экспресс-хизмат» хизмати ишга туширилган. Бу хизмат тури орқали эндиликда зарур ҳужжатларни давлат хизматлари марказларига бормасдан туриб, почта орқали ҳам олиш имкони мавжуд бўлади.

Ҳозирча ушбу қулайлик тажриба тариқасида:

– судланмаганлик (ёки судланганлик) тўғрисида маълумотномаларни олиш;

– никоҳ қайд этилганлиги, никоҳда турмаслиги ёки никоҳдан ажралганлиги тўғрисидаги маълумотномани олиш;

– манзил-маълумот ахборотларини тақдим этиш хизматлари учун жорий қилинган.

Таъкидланишича, тез орада бу турдаги хизматлар сони кенгайиб боради.

Мазкур хизмат фақатгина ихтиёрийлик асосида кўрсатилади.

Тўлов мавжуд бўлган хизматларда экспресс-хизматдан фойдаланишда, аризачига экспресс-хизмат инвойси ва бошқа тўлов инвойси бир вақтда берилади.

Ҳозирча ҳужжатларни етказиб бериш экспресс-хизмати нархи 8000 сўм қилиб белгиланмоқда.

Ушбу қулайликдан фойдаланиш учун:

1. Аризачининг ихтиёрига кўра, ариза тўлдириш жараёнида охиргидан битта олдинги қадамда (бошқа хизматларда охирги қадамда бўлиши ҳам мумкин) «Почта хизматидан фойдаланиш» тугмаси босилади;
2. Почта олувчининг маълумотлари тўлдирилади ва етказиб берилиши керак бўлган ҳужжат(лар) танланади;
3. «Давом этиш» тугмасини босиш орқали экспресс-хизматлар учун тўловга инвойс шакллантирилади;
4. «Ариза тўлдиришни давом этиш» тугмаси босилади;
5. Ариза тўлиқ шакллантирилади ва юборилади.

Маълумот учун: Давлат хизматлари агентлигига ташриф буюрувчи аҳоли сони таҳлил қилганда, уларнинг 70 фоизи айнан тайёр ҳужжатни олиб кетиш учун келиши аниқланган.

Мазкур «экспресс-хизмат»нинг ишга туширилиши Марказларда мижозлар оқимининг кескин камайишига хизмат қилиб, ортиқча навбат кутишнинг олдини олади.