Трамп Афғонистондан тўрт минг нафар ҳарбийни олиб чиқиб кетмоқчи – ОАВ

Фото: AP

АҚШ президенти Дональд Трамп яқин вақт ичида Афғонистондан тўрт минг нафар америкалик ҳарбий олиб чиқиб кетилишини эълон қилиши мумкин. Бу ҳақда ўз манбаларига таяниб NBC News телеканали хабар берди.

Айни пайтда Афғонистонда АҚШнинг 12-13 мингга яқин аскари жойлаштирилган. Ҳарбийларни олиб чиқиб кетиш қачондан бошланиши аниқ эмас, аммо бу жараён икки ойга яқин вақтни олади, деган манба.

Аввалроқ АҚШнинг Афғонистон бўйича махсус вакили Залмай Халилзад АҚШ "Толибон" ҳаракати билан тинчлик музокараларини вақтинча тўхтатиб туришини маълум қилганди.

NBC телеканалининг эслатишича, Трамп аввалроқ ўз маслаҳатчиларига 2020 йил ноябрга қадар Афғонистондаги барча америкалик ҳарбийларни олиб чиқиб кетиш ниятида эканлигини айтган.