Туркия АҚШга Patriot тизимларини сотиб олиш таклифини йўллади

Туркия ташқи ишлар вазири Мавлут Човушўғлу Анқара АҚШга Patriot ракеталар ҳужумидан мудофаа тизимини сотиб олиш таклифини йўллаганини маълум қилди. Бу ҳақда “РИА “Новости” ахборот агентлиги хабар берди. 

Човушўғлунинг айтишича, Туркия ҳамон АҚШга ўз иттифоқдоши деб қарайди. 

Дипломатнинг таъкидлашича, Россия билан С-400 зенит-ракета мажмуаларини сотиб олиш бўйича битим бекор қилина олинмайди.

“Россиянинг таклифи нафлироқ эди ва биз уни қабул қилдик. Ҳозир АҚШдан Patriot тизимини сотиб олишга тайёрмиз ва уларнинг жавобини кутмоқдамиз”, деб айтган Човушўғлу. 

Шу билан бирга вазир АҚШ Туркияга С-400 туфайли санкциялар киритса, Анқара жавоб беришига тўғри келишини қўшимча қилган.

Бу орада АҚШ сенатининг халқаро ишлар бўйича қўмитаси Туркияга С-400 мажмуаларини сотиб олганлик ва Сурияда ҳарбий амалиёт ўтказганлик учун санкциялар киритишни кўзда тутувчи қонун лойиҳасини маъқуллади. Унга кўра, Анқарага АҚШ қуролини сотишни чеклаш ва Суриядаги турк ҳарбийларига қурол етказишни назорат қилувчи амалдорларга қарши санкциялар киритиш режалаштирилган. Қонун лойиҳаси кучга кириши учун конгресснинг икки палатаси томонидан маъқулланиб, сўнгра АҚШ президенти томонидан имзоланиши лозим.