Австралиядаги ёнғинлар тутуни Жанубий Америкагача етиб борди 

Австралияда бир неча ойдан бери тўхтамаётган ўрмон ёнғинлари тутуни Жанубий Америкагача етиб бориб, Чилининг марказий ва жанубий ҳудудларининг катта қисми устидаги осмонни эгаллади. Бу ҳақда Чилининг MeteoChile метеорологик хизмати хабар берди. 

“Тасвирда Австралиядаги ёнғинлар тутунини кўриш мумкин. Ҳаво оқими уни Чили ва Аргентинагача етказди”, деб маълум қилган MeteoChile ўз хабарида. 

Охирги маълумотларга кўра, ёнғинлардан ҳалок бўлганлар сони 25 нафаргача етди, ярим миллиарддан кўпроқ жонзот нобуд бўлган. 1400 дан кўпроқ уйнинг кули кўкка совурилган. Умумий ҳисобда ёнғинлар туфайли мамлакатнинг 6 та штатида 6 млн гектарга яқин майдон аланга ичида қолган. Об-ҳаво мутахассисларининг маълумотларига кўра, ёнғинлар ҳаво ҳарорати кўтарилиши сабабли 9 январга келиб янада кучаяди. Баъзи жойлардла ёнғинлар шунчалик кучли, тутунлар эса қуюқ бўлмоқдаки, уларни ҳаводан ўчиришнинг иложи бўлмаяпти. Ҳукумат жабрланган ҳудудларга ҳарбий кемалар ва авиация жўнатмоқда. Австралиянинг жануби-шарқий соҳилида катта кўламли эвакуация олиб борилмоқда.

Австралиядан Жанубий Америкагача масофа тахминан 16 минг кмни ташкил қилади.