Австралиядаги ўрмон ёнғинлари тутуни яқин орада Ер атрофини тўлиқ айланиб чиқади 

Австралияда бир неча ойдан бери давом этаётган ўрмон ёнғинлари тутуни яқин орада Ер атрофини тўлиқ айланиб, яна Австралияга қайтади. Бу ҳақда НАСА мутахассислари маълум қилишди, деб хабар берди ВВС телеканали.

“Тутун Ер атрофида камида бир марта тўлиқ айланиши кутилмоқда”, деб айтилган АҚШ коинот агентлигида. Маълумотларга кўра, 8 январда тутун Тинч океанини кесиб ўтиб, сайёрамиз атрофидаги ярим йўлни босиб ўтган.

A fleet of NASA satellites 🛰️ working together has been analyzing the aerosols and smoke from the massive fires burning in Australia.https://t.co/93geNvCBnU pic.twitter.com/ZedZ199lvJ

— NASA Goddard (@NASAGoddard) January 9, 2020

Ҳозирга келиб Австралиядаги катта кўламли ёнғинлар оқибатида 28 киши ҳалок бўлган, миллиарддан кўпроқ жонзот нобуд бўлган ва 10 млн гектарга яқин ўрмон ёниб кетган. 

НАСА мутахассисларининг таъкидлашича, Австралиядаги ўрмон ёнғинлари ёниш маҳсулотлари 18 км баландликдаги страстосферада аниқланган. “Тутун страстосферага тушгач, ўз манбаидан минглаб милларга тўзғиб кетиши ва бутун дунёда атмосферага таъсир қилиши мумкин”, деб айтилган НАСА’да.

Коинот агентлигида таъкидланишича, Австралиядаги ёнғинлар тутуни Жанубий Америкада осмоннинг ранги ўзгариши ва Янги Зеландияда ҳавонинг ифлосланиши ҳамда тоғ чўққиларидаги қорнинг ранги ўзгаришига олиб келган.