Хитойда коронавирус қурбонлари сони 26 нафарга етди. Уханда махсус шифохона қурилиши бошланди

Фото: REUTERS / Darley Shen

Хитойда янги типдаги 2019-nCoV коронавируси тарқалиши ўчоғи ҳисобланган Ухань шаҳрида вирусдан касалланганларни жойлаштириш учун янги шифохона қурилиши бошланди. Бу ҳақда Хитой марказий телевидениеси хабар берди.

24 январь эрталабдан шифохона қуриладиган майдончада ўнлаб экскаваторлар ишни бошлаб юборган. Шифохонани 2 февралгача қуриб битказиш режалаштирилган. У ерда минг нафаргача бемор жойлаштирилиши мумкин.

Шифохонани 2003 йил апрелда SARS (атипик зотилжам) эпидемияси вақтида 7 кун ичида қурилган Пекиндаги “Сяотаншань” шифохонаси модели бўйича қуришмоқчи. Ўшанда шифохона ўз ичига минг нафаргача беморни сиғдира олган, унда 2 ой давомида Хитойнинг турли ерларидан беморлар даволанган.

Охирги маълумотларга кўра, Хитойда янги коронавирусдан касалланганлар сони 830 нафардан ошиб кетди, унинг қурбонлари сони 26 нафарга етди. Қурбонлардан 24 нафари Ухань жойлашган Хубэй провинциясида, яна 2 нафари унинг ташқарисидаги ҳудудларда вафот этган.

Вирус, шунингдек, Хитой ташқарисига чиқиб, у билан касалланиш ҳолатлари Жанубий Корея, Япония, АҚШ, Вьетнам, Сингапур ва Таиландда қайд қилинган.

Тайёрлаган: Шуҳрат Раҳимов

#Ухань #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.