Аввалроқ интернетда кекса отаси билан қўпол муносабатда бўлаётган эркак видеоси тарқалганди.
Маълум қилинишича, видеодаги воқеа ўрганилиб, у 9 февралда юз бергани аниқланган. 51 ёшли М.А. саломатлигидаги муаммолар сабабли ўзи мустақил ҳаракатлана олмайдиган 86 ёшли отасини туртиб, уни койиган.
Мирзо Улуғбек тумани Ички ишлар органлари фаолиятини мувофиқлаштириш бошқармаси ходимлари маҳалла фуқаролар йиғини вакиллари билан биргаликда М.А. билан тушунтириш ишлари олиб боришган ва эркакка кекса отасига қарашда ёрдам кўрсатилишига ваъда беришган.
Мирзо Улуғбек туманининг маъмурий суди М.А.ни Ўзбекистон Республикаси Маъмурий жавобгарлик тўғрисидаги кодексининг 183-моддасида (Майда безорлик) кўзда тутилган маъмурий ҳуқуқбузарликни содир этишда айбдор деб топиб, унга 7 суткалик маъмурий қамоққа олиш жазосини тайинлаган.
