Тошкентда Миллий гвардия ходимига тан жароҳати етказган шахс қўлга олинди

Жорий йилнинг 14 февраль куни соат 23:00да Шайхонтоҳур тумани навбатчилик қисмига хабар келиб тушган. Бу ҳақда Тошкент шаҳар ИИББ маълумот берди.

Унга кўра, "Шодлик" маҳалласидаги хонадонлардан бирида жанжал келиб чиққан. Воқеа жойига ППХ ва Миллий гвардия ходимлари етиб боришган. 

Ходимлар маст ҳолатда қўлида пичоқ ушлаб турган эркакни тинчлантирмоқчи бўлганларида, у Миллий гвардия ходимига тан жароҳати етказган. 

Улар 25 ёшли Б.А.ни қўлга олиб, Шайхонтоҳур тумани ИИО ФМБ 8-сон ИИБга ҳолатни атрофлича ўрганиш ва қонуний чора кўриш учун олиб боришди. 

Б.А. муқаддам судлангани аниқланди, дейилади хабарда.