Собиқ онкология шифохоналари ҳудуди ҳозир қанақа ҳолатда?

Kun.uz Тошкент шаҳрида шов-шувли тарзда кўчириб юборилган иккита онкология шифохонаси ҳудудининг ҳозирги ҳолатига эътибор қаратди. Маълум бўлишича, улардан бирининг атрофи ўраб олинган, айрим дарахтлар қурий бошлаган. Режага кўра, икки ҳудуднинг бирида креатив парк, яна бирида яшил жамоат боғи ташкил этилиши керак.

2025 йил ноябрида Тошкент шаҳридаги иккита онкологик шифохона бўшатилган ва у ерда ишлайдиган ходимлар ҳамда беморлар бундан норози бўлишган эди. Улар бу навбатдаги бизнес режа бўлиши мумкинлигидан хавотир билдиришганди.

Kun.uz ўша бўшатилган шифохоналарда бўлиб, вазиятни ўрганди. Саволларимизга пойтахт ҳокимлигидан бир кун давомида жавоб олишнинг имкони бўлмади.

Собиқ Республика онкология маркази

Маълум бўлишича, собиқ Республика ихтисослаштирилган онкология ва радиология илмий-амалий тиббиёт маркази ҳудуди ўраб олинган. Ичкаридаги дарахтларнинг бир қисми қурий бошлаган.

Жорий йил 16 феврал куни имзоланган президент қарорига асосан, Шайхонтоҳур тумани Форобий кўчасида, 9,4 гектар майдонда жойлашган ушбу яшил ҳудуд ва бино-иншоотлар негизида Креатив индустрия парки давлат-хусусий шериклик асосида ташкил этилиши белгиланган.

Лойиҳа 2026-2027 йилларда амалга оширилиши, якунда Креатив парк ҳудуди 24/7 режимда фаолият юритадиган очиқ жамоат маконига айланиши керак.

Креатив парк – сайр қилиш учун мўлжалланган ва арт-объектлардан иборат яшил боғ, рақамли дизайн ва дастурлаш йўналишида халқаро мактаб; бук-кафе; спорт ва воркаут майдончалари; меҳмонхона; коворкинг маркази; бадиий ижодкорлар павильони; креатив устахоналар; кино ва видеомаҳсулотларни ишлаб чиқариш зоналаридан иборат бўлиши кўзда тутилган.

Тошкент шаҳар онкология шифохонаси

Собиқ Республика онкология марказининг Тошкент шаҳар филиали ҳам қаровсиз ётганига гувоҳ бўлдик. Бу ернинг атрофи ўраб олинмаган, шунингдек, қуриётган дарахтларни учратмадик.

Собиқ Тошкент шаҳар онкология диспансери ҳудуди

“Тоза ҳаво” умуммиллий лойиҳасини амалга ошириш юзасидан жорий йил 25 март куни имзоланган президент фармонига асосан, Чилонзор тумани Лутфий маҳалласи Боғистон кўчасида жойлашган 4,36 гектарлик бу ҳудудда яшил жамоат парки ташкил этилиши белгиланган.

Фармонда пойтахт ҳокимлиги бу топшириқни 2026 йил охирига қадар бажариши кераклиги кўрсатилган. Аммо, афтидан, ишлар ҳали бошланмаган, ваҳоланки, қулай ва замонавий яшил маконлар аҳолига айнан ҳозир – жазирама ёз кунларида керак.

Дарахтлар масаласи эътиборсиз қолмаслиги керак

Бу иккита шифохона ҳудудида жами 1500 дан зиёд дарахт бўлиб, улар орасида Қизил китобга киритилганлари ҳам, қимматбаҳо навларга кирадиган дарахт турлари ҳам бор.

Собиқ Республика онкология маркази ҳудуди

2025 йил охирида экология инспекторлари иккала ҳудуддаги барча дарахтларни хатловдан ўтказишган эди. Бироқ экология органи хатлов билан чекланиб қолмай, ҳолат мониторингини ҳам таъминлаши мақсадга мувофиқ.

Айниқса Креатив парк ҳудудида биноларни демонтаж қилиш ва капитал қурилиш ишлари бўлиши эҳтимоли инобатга олинса, бу ишлар давомида дарахтларга зиён етказилишининг олдини олиш талаб этилади.

Эслатиб ўтамиз, бу иккита шифохона ҳудуди 2022 йилда аукционга қўйилиб, аҳоли норозилигидан кейин сотув жараёни тўхтатилган эди.