Тадбиркорлик ва рақобатга таъсир кўрсатувчи ҳужжатлар сони камида 25 фоизгача қисқаради

Тадбиркорлик фаолияти, инвестиция ва рақобат муҳитига таъсир кўрсатувчи норматив-ҳуқуқий ҳужжатлар ва техник тартибга солиш ҳужжатларидан иборат маъмурий ва тартибга солиш юкини кескин камайтириш ва асоссиз тўсиқларни олиб ташлаш мўлжалланмоқда

Фото: Shutterstock

2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Илм-маърифат ва рақамли иқтисодиётни ривожлантириш йили”да амалга оширишга оид давлат дастури лойиҳаси эълон қилинди.

Қайд этилишича, 2020 йил 1 сентябрга қадар Ўзбекистон Республикаси президенти қарори лойиҳаси ишлаб чиқилади.

Лойиҳада:

тадбиркорлик фаолияти ва рақобат муҳитига таъсир кўрсатувчи 6 мингдан ортиқ қонун ҳужжатларини ва 40 мингдан ортиқ техник тартибга солиш ҳужжатларини ялпи хатловдан ўтказиш ва улар сонини камида 25 фоизгача қисқартириш;

соғлом рақобатни таъминлаш орқали нархларни пасайтиришга ва сифатни оширишга асосий эътибор қаратиш;

инвестиция ва тадбиркорлик фаолиятини тартибга солиш назарда тутилган янги норматив-ҳуқуқий ҳужжатни киритиш билан бир вақтда, инвесторлар сарф-харажатларини 2 баробар оширувчи амалдаги норматив-ҳуқуқий ҳужжатларни бекор қилиш;

инвестиция ва тадбиркорлик фаолиятини тартибга солишда қонун ҳужжатлари таъсирини баҳолашнинг тўлиқ тизимини жорий этиш назарда тутилади.

Ижро учун масъуллар - Адлия вазирлиги, Бизнес омбудсман, Монополияга қарши курашиш қўмитаси, Кичик бизнес ва тадбиркорликни ривожлантириш агентлиги, Савдо-саноат палатаси Ҳисоб-китобларга асосан Иқтисодий ислоҳотларни қўллаб-қувватлашга ажратилган Жаҳон банки маблағлари.