ФВВ Бухородаги ёнғин ҳақида қўшимча маълумот берди

Фавқулодда вазиятлар вазирлиги Бухоро вилоятида савдо биноларида содир бўлган ёнғин ҳақида қўшимча маълумот тақдим этди.
 
Жорий йилнинг 26 февраль куни соат 22:37да Бухоро шаҳар Б.Нақшбанд кўчасида жойлашган савдо биноларида ёнғин содир бўлаётганлиги ҳақида ёнғин-қутқарув хизматига хабар келиб тушган.

Ёнғинни бартараф этишга 15 та асосий, 2 та махсус ёнғин ўчириш автомобиллари ва 20 тадан ортиқ ёрдамчи техникалар жалб қилиниб, соат 00:40да ёнғинни тарқалиши олди олинди ва соат 01:30да батамом ўчирилди.

Ёнғин майдони 520 кв.м.ни ташкил этди. Ёнғин натижасида ҳалок бўлганлар ва тан жароҳати олган шахслар мавжуд эмас.

“Ҳурматли фуқаролар, ёнғин хавфсизлиги қоидаларига риоя қилишингизни сўраймиз”, - дейилади маълумотда.

Аввалроқ, Бухорода йирик ёнғин содир бўлгани хабар берилганди.