«Насаф» чемпион бўла оладими? «Аждарлар»нинг янги мавсумга тайёргарлиги ҳақида

Янги мавсумда Ўзбекистон чемпионатида «Пахтакор»нинг чемпион бўлишига кўпчилик ишонмоқда, чунки рақобатчилар етарлича кучли эмасдек. «Локомотив», «Бунёдкор» ва «Насаф» Арвеладзе жамоасининг асосий рақобатчиси сифатида қаралмоқда. «Пахтакор»га доим жиддий рақобатчи бўлган «Насаф» мавсумга қандай тайёрланмоқда? Бердиев жамоани тарк этган етакчилар ўрнини тўлдира олганми?

«Насаф» жамоани етакчилар тарк этишига ўрганиб қолган. Ҳар мавсум бошида Бердиевнинг бир қатор шогирдлари бошқа жамоаларга ўтиб кетади. Жорий мавсумда ҳам бу «анъана» сақланиб қолди. «Насаф»ни ўтган мавсум тугагач Азиз Ғаниев, Ҳумоюн Муртазоев, Сардор Абдураимов, Ислом Рашидхонов, Хуршид Мухторов, Умар Эшмуродов каби етакчилар тарк этди. Улар орасида айниқса икки футболчини алоҳида таъкидлаш керак. Умар Эшмуродов жамоа сардори, Азиз Ғаниев эса асосий юлдуз эди.

Рўзиқул Бердиев бу футболчиларнинг ўрнини асосан мавжуд футболчилар ёрдамида тўлдирди. Ҳимоя марказида Умар Эшмуродовнинг ўрнини Ҳусниддин Алиқулов эгаллади, Азиз Ғаниев ўрнига энди Ойбек Бозоров плеймейкерлик қилади. Бердиев майдон марказидаги Ғаниев ва Абдураимов кетгач пайдо бўлган бўшлиқни тўлдириш учун Дилшод Раҳматуллаевни жамоага чақирди. Бир неча мавсум аввал ҳам «Насаф»да ўйнаган Дилшод «Андижон»ни тарк этиб Қаршига келди.

Шунингдек босниялик Дилавер Харис ҳам «Насаф» билан шуғулланмоқда. Ҳар қанча футболчилар бошқа клубларга ўтиб кетмасин «Насаф»да яхши таркиб шаклланган. Ҳозир клубда ҳар бир чизиқда икки нафардан номзод бор.

Мавсум олдидан фикрларини билиш учун Рўзиқул Бердиевга юзландик: «Мавсумга имкон қадар яхши тайёрландик. Футболчилар йиғилиши қийин бўлди. Аввалига олимпия жамоасининг Осиё чемпионатида иштироки сабаб кўпчилик футболчиларимиз биз билан шуғуллана олишмади, кейин легионерлар келди. Туркиядаги йиғинга асосий эътиборни қаратдик, у ерда барча футболчиларнинг жисмоний тайёргарлигини бир хил ҳолатга келтириш устида ишладик.

Биз мавсум олдидан яхши ўйинчиларни йўқотдик, аммо бу футбол. Жамоадан кетганлар ўрнини тўлдириш учун футболчилар жалб қилдик. Марказда Азиз Ғаниевнинг ўрнини тўлдириш учун Дилшод Раҳматуллаев ва яна бир легионер футболчи келди. Кетган йигитларнинг ўрнини имкон қадар тўлдирдик. Яна бир қатор футболчиларни кузатяпмиз.

Чемпионлик? Вазиятга реал қараш керак, «Пахтакор» қолганлардан анча устун. Аммо биз натижаларимизни яхшилаш учун ҳаракат қиламиз. Қанчалик оғир бўлмасин, юқори мақсадлар учун курашамиз».

«Насаф» биз борган куни машғулотни ўринбосарлар жамоасининг майдонида ўтказди. Машғулот жараёнидан чиқиб клубнинг стадионига бордик ва Қаршидаги «Марказий» стадиони мавсумга тайёрлигини кўрдик. Ўзбекистондаги энг ажойиб ареналардан бўлган «Насаф» стадиони чиндан жуда чиройли. Айниқса тепадан қараганда.

Шу ўринда «Марказий» номини олган стадион ҳақида икки оғиз. Қарши шаҳри Мустақиллик кўчаси 5-шоҳ кўчада жойлашган стадион 2006 йил фойдаланишга топширилган бўлиб 2009 йилда «Насаф» ихтиёрига ўтган. 2017 йилда тўлиқ реконструкциядан чиқарилган бу арена 21 минг мухлисни ўз бағрига сиғдира олади. 2011 йил «Насаф» ОФК кубоги финалига Қувайтнинг «Ал Қувайт» клубини айнан «Марказий»да мағлуб этган. Бу ажойиб стадионда мухлисларини кўп марта хурсанд қилган «Насаф»га янги мавсумда омад тилаймиз.