Amazon коронавирус эпидемияси шароитида 100 минг янги ишчи ёлламоқчи

Amazon компанияси АҚШда коронавирус эпидемияси шароитида уйларида карантинда қолаётганларга маҳсулотлар етказиб бериш учун омбор ишчилари ва курьерларни ёлламоқчи. Ҳаммаси бўлиб 100 минг ишчи ёллаш режалаштирилган.

Фото: Glassador

Бу ҳақда The Verge нашри хабар берди. АҚШда Жаҳон соғлиқни сақлаш ташкилотининг вирус тарқалиши олдини олиш учун уйларда қолиш кераклиги ҳақидаги тавсиялари уйларга товарларни етказиб беришга талабнинг ошишига олиб келган. Шу сабабли компания 13 март куни мижозларни етказиб беришларда ушланишлар бўлиши мумкинлиги ва баъзи товарлар йўқлигидан огоҳлантирган.

Компанияда вақтинчалик иш ўринларини АҚШнинг бир қатор штатларида коронавирусга қарши кураш доирасида ёпилган бар, ресторан ва кинотеатрлар ходимлари эгаллашига умид қилинмоқда. Компания янги ишчиларни ёллаш ва амалдаги ходимларини рағбатлантириш мақсадида соатбай иш ҳақини оширишга қарор қилган. Мисол учун, АҚШда соатбай иш ҳақи 2 долларга, Буюк Британияда 2 фунт стерлингга, Европанинг кўплаб давлатларида тахминан 2 еврога оширилади. Компания бу мақсадда 350 млн доллар ажратмоқчи.

Шунингдек, Amazon ўз ишчилари хавфсизлигини таъминлаш учун тиббий мутахассислар билан маслаҳатлашувлар олиб бормоқда.

#Amazon #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.