Меркель коронавирусга чалинган шифокор билан алоқадан кейин карантинга кетди

Германия канцлери Ангела Меркель 20 март куни унга эмдори киритган шифокор коронавирусга чалинганидан хабар топгач карантинга кетишга қарор қилди.

Бу ҳақда канцлер вакили маълум қилди, деб хабар берди Deutsche Welle нашри.

Касалланган шифокор Меркелга зотилжамдан профилактик эмдори киритган. Канцлер уйидан ишлашни давом эттиради. У яқин кунларда коронавирусга кўрикдан ўтади.

Маълум қилинишича, Меркель Германияда коронавирусга қарши кураш бўйича янги чекловлар жорий қилинишини эълон қилишидан кейиноқ шифокорда вирус борлиги тасдиқлангани ҳақида маълумот олган.  

Янги чекловларга кўра, мамлакатда биргаликда яшовчи оила аъзоларидан ташқари, 2 кишидан кўпроқ бўлиб йиғилиш, жамоат жойларида бир-бирига 1,5 метрдан камроқ масофага яқинлашиш тақиқланади.

Шунингдек, мижозлар орасида 2 метрдан кўпроқ масофани таъминлай олмайдиган кафе, ресторанлар ва хизмат кўрсатиш корхоналари вақтинча мижозлар қабул қилишни тўхтатишлари керак бўлади.

Меркелнинг таъкидлашича, полиция бу чекловларга амал қилиниши ортидан кузатиб боради.

Айни вақтда Германия коронавирусга чалиниш ҳолатлари бўйича Европада Италия ва Испаниядан кейин 3-ўринни эгалламоқда. Бу ерда касалланганлар сони 18 мингдан ошиб кетди, вафот этганлар сони 45 нафарни ташкил қилмоқда. 

Аввалроқ Меркель коронавирусни Германия учун Иккинчи жаҳон урушидан кейинги энг жиддий чақириқ деб атаганди.