Оксана Чусовитина Олимпиадада иштирок этиш учун катта спортда яна бир мавсум қолади

“Мен Халқаро Олимпия қўмитасининг Олимпиадани бошқа муддатга кўчириш қарорини тушунаман, ахир асосийси – бу одамлар соғлиғидир. Мен Токиодаги Ўйинларда ўз фаолиятимни якунламоқчи эдим ва ўз режамни ўзгартирмоқчи эмасман. Мен ушбу Олимпиадада иштирок этиш учун гимнастикада яна бир мавсум қолиб, унга тайёрланаман”, деб айтган спортчи.

Айни вақтда Чусовитина карантин киритилгани сабабли Тошкентдаги меҳмонхонада Ўзбекистон терма жамоаси билан бирга қолмоқда. Спортчининг таъкидлашича, меҳмонхонада машғулотлар ўтказиш учун зал мавжуд. 

Афсонавий спортчимиз Олимпиада лицензиясини 2019 йил Штутгартда ўтган жаҳон чемпионати натижаларига кўра қўлга киритганди. Токиодаги Олимпиада спортчи учун фаолиятидаги саккизинчиси бўлади. Чусовитина бу борада жаҳон рекордчиси ҳисобланади.

Чусовитина уч карра жаҳон ва Европа чемпиони ҳисобланади. Фаолияти давомида у собиқ иттифоқ, Германия ва Ўзбекистон миллий терма жамоалари сафида иштирок этган. Номдор спортчимиз 1992 йилги Олимпиадада дебют қилган ва собиқ иттифоқ давлатларининг бирлашган жамоаси сафида олтин медални қўлга киритган.

24 март куни ХОҚ жорий йилда ўтказилиши керак бўлган ёзги Олимпиадани коронавирус пандемияси сабабли 2021 йилга кўчиришга қарор қилди. Олимпиада ўтказиладиган янги сана 4 ҳафта ичида маълум қилинади.