Оксана Чусовитина Жаҳон кубоги финалига чиқди

Боку шаҳрида ўтаётган спорт гимнастикаси бўйича Жаҳон кубогининг дастлабки саралаш баҳсларида Ўзбекистон терма жамоаси аъзоси Оксана Чусовитина таяниб сакраш дастурида финал йўлланмасини қўлга киритди.

Чусовитина квалификацияда 13.049 балл билан учинчи поғонани эгаллади.

Мазкур йўналишдаги финал 7 март санасига белгиланган.

Маълумот учун, Оксана Чусовитина саккиз карра Олимпиада иштирокчиси саналади. У 1992 йилда Барселонада Бирлашган жамоа таркибида жамоавий мусобақада олтин медални қўлга киритган, 2008 йилги Пекин Олимпиадасида Германия терма жамоаси таркибида кумуш медалга эга чиққан.

50 ёшли афсонавий спортчи ўтган йили Озарбайжонда ўтган спорт гимнастикаси бўйича Жаҳон кубогида олтин медалга сазовор бўлганди.