Нурмат Отабеков: “Вирусология институти ёпилгунига қадар топширилган таҳлиллар йўқолиб кетмайди”

“Бу касалликка чалинганларни алоҳидалашдан асосий мақсад – маиший мулоқотни, касаллик юқиш эҳтимолини камайтириш. Касаллик асосан икки хил йўл билан юқяпти. Карантинда турган одамларга озиқ-овқат маҳсулотлари киритиш мумкин эмас. Унда ўрнатилган карантиндан мантиқ қолмаган бўларди. У ерда  ташкил қилиниши керак бўлган дўкон ҳақидаги фикрингизга қўшилмаган бўлардик. Негаки, бу каби муассасаларнинг барчасида давлатимиз бюджети томонидан барча имкониятлар яратилган. Сиз [у ерга] бепул жойлаштирилгансиз, озиқ-овқат маҳсулотларини етарли миқдорда рационга қараб бериляпти. Агар сизда қандли диабет касаллиги бўлиб, қўшимча овқатланишга эҳтиёж бўлса, у ҳолда мана шу “Энергетик” маъмуриятига мурожаат қилсангиз, сиз учун алоҳида таом тайёрлаб беришлари мумкин бўлади”, - деди Нурмат Отабеков.

У Вирусология институти карантинга ёпилгунига қадар гепатит касаллигига қон таҳлили топширганлар бугунги кунда унинг жавобларини қандай олишларини мумкинлигини айтди.

“Сизнинг лаборатор натижаларингиз йўқолиб кетмайди. Агар ана шу институт маъмуриятига мурожаат қилсангиз, сизга айтишади. Маълумотни телефон орқали олишингиз мумкин”,- деди Нурмат Отабеков.

Матбуот анжумани давомида Фарғона вилояти, Мустақиллик 22, Маҳалла фуқаролар йиғини худудида Кореядан қайтган 3 нафар фуқароларнинг карантинга олинмагани ҳақидаги масалага ҳам ойдинлик киритилди.

“Ўзбекистон ҳудудида карантин тадбирлари 16 мартдан ўтказила бошланди. Агар у фуқаролар карантин тадбирлари белгилангунига қадар Ўзбекистон ҳудудига етиб келган бўлса, улар бу тадбирлар билан қамраб олинмаган. Агар бу каби ҳолатлар аниқланган бўлса, ҳудудингиздаги тиббиёт муассасасига ўз вақтида хабар беришингиз керак. Ҳозирги пайтда касалликка чалинган ҳар бир киши ва улар билан мулоқотда бўлганлар эпидемиологик суриштирув жараёнида аниқланяпти ва улар шифохонага жойлаштириляпти ёки уй шароитида алоҳидаланяпти”, - деди Нурмат Отабеков.