Хитойлик шифокор коронавируснинг енгил аломатларига эга беморларни ҳам карантинга олишга чақирди

Италияликларга коронавирусга қарши курашда ёрдамлашаётган хитойлик шифокор касалликнинг ҳар қандай аломатига эга беморларни шифохонага ётқизишга чақирди. Унинг сўзларига кўра, бундай шахсларни уйда карантинда қолдириш – Уҳан сценарийсига ўхшаш фалокатга олиб келади. Чунки уларнинг ҳаммаси кўрсатмаларни 100 фоиз бажармайди.

Фото: REUTERS / China Daily

30 март куни хитойлик шифокор COVID-19 касаллигини даволаш билан боғлиқ аччиқ тажрибаси билан ўртоқлашди. Bloomberg агентлиги хабарига кўра, айни пайтда хитойлик шифокорларнинг бир гуруҳи Италияда маҳаллий ҳамкасбларига ёрдам бермоқда. Улардан бири Сичуан университети Ғарбий Хитой шифохонаси респиратор касалликлари бўлими бошлиғи Лян Цзун Ан коронавирус юқтириб олганларни уйда даволаш натижасида эпидемия янада хуруж олишини айтди.

Лян сўзларига кўра, Уҳанда енгил аломатларга эга ва шифокорлар назоратига муҳтож бўлмаган баъзи беморлар уйда қолдирилган. Якунда эса карантин шартларини бузиб, кўчага чиқишган ва бошқа одамлар билан контактда бўлишган ёки ўз оила аъзоларига касалликни юқтиришган. Қайд қилиш жоизки, Хитойдаги касалланганларнинг энг кўпи айнан Уҳан шаҳридан бўлган.

Коронавируснинг тезкор тарқалишининг олдини олишга ёрдам берган ягона чора – ниҳоятда қаттиқ карантин бўлган. Хубэй вилояти маъмурияти стадион, офислар ва мактабларни касаллик даражаси қандай бўлишидан қатъи назар, барча учун вақтинчалик шифохонага айлантиришган. Шундан сўнг COVID-19 тарқалиши пасайган.

Эслатиб ўтамиз, Хитой 30 март куни коронавирус эпидемиясига барҳам берилганини эълон қилди. Ўтган кун давомида мамлакатда касаллик юқтириб олганлар сони атиги 3 мингни ташкил қилди. Хубэй вилояти эса карантинни бекор қилди.

Тайёрлаган: Сардор Юсупов

#коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.