Кремль Путиннинг саломатлиги аъло даражада эканини маълум қилди

Владимир Путиннинг саломатлиги «аъло даражада», гарчи тадбирлар одатдагидан бироз кўпайган бўлса ҳам. Бу ҳақда Кремлнинг расмий вакили Дмитрий Песков «Первий канал» эфирида кетган «Большая игра» дастури чоғида айтиб ўтди.

«Аъло даражада. Буни унинг иш графигидан ҳам билишингиз мумкин. Барча алоқалар видеоконференция режимида амалга оширилмоқда, тадбирларнинг ўзи оддий вақтдагига нисбатан кўпроқ ҳам бўлаётгандек. Ва, табиийки, янада қизғин ишлашга тўғри келмоқда», — деган Путиннинг матбуот котибидан иқтибос келтирди РИАН.

Песковнинг сўзларига кўра, президентнинг фаолиятини таъминловчи администрация ходимларининг катта қисми ҳар куни коронавирусга текшириш учун тест топширишмоқда.

Маълумот учун, 26 март куни РБК президент ишлари бошқармаси ва администрациясида коронавирус юқтирганлик шубҳаси билан боғлиқ ҳолатлар аниқлангани ҳақида хабар берган эди. Эртаси куни Песков Кремль ходимлари орасида вирус юқтирган киши топилганини тасдиқлаган эди. Матбуот котибининг сўзларига кўра, Путин бемор билан алоқада бўлмаган.

Путин ўзининг 9 апрель кунги миллатга мурожаатида коронавирус устидан ғалаба қозонилишини ваъда қилганди. Унинг маълум қилишича, Россияда эпидемияга қарши курашнинг бориши учун «яқин 2-3 ҳафта» ҳал қилувчи бўлади, бу муддат ичида барча ресурслар жалб қилинади.

Хусусан, Путин ИИВ ва Росгвардияга карантин учун назорат бўйича қўшимча чора-тадбирлар кўришни топширган. Идоралар вирус бўйича аҳвол кўнгилдагидек бўлмаган мамлакатлардан келганларни кузатиш, шифохоналар ҳамда эпидемияга қарши курашда иштирок этаётган бошқа муассасаларни қўриқлашни кучайтиришади.

11 апрель ҳолатига, Россияда 13 584 киши коронавирус юқтирган. 106 киши вафот этган. COVID-19нинг тасдиқланган ҳолатлари сони бўйича Россия жаҳонда 17-ўринда турибди.