Атом энергияси бўйича халқаро агентлик Ўзбекистонга коронавирусни аниқлашда ёрдам берадиган ускуналар етказиб беради

Ўзбекистон Республикаси Саноат хавфсизлиги давлат қўмитаси ва Соғликни сақлаш вазирлиги иштирокида Атом энергияси бўйича халқаро агентлик (АЭХА) ҳамда Ўзбекистон Республикаси ўртасидаги техник ҳамкорлик дастури доирасида АЭХА раҳбарияти томонидан Ўзбекистон Республикаси Соғлиқни сақлаш вазирлиги Вирусология илмий-тадқиқот институтига ташхис қўйувчи тест-тизимлар комплектли ускуна етказиб бериш ҳақида қарор қабул қилди.

Комплектлар ўз ичига коронавирусни аниқлашда янги RT-PCR – реал вақтдаги полимераз занжир реакцияси (ПЦР) услубини қўлловчи реагентлар, тест материалини қабул қилиш, рўйхатдан ўтказиш ва бирламчи ишлов бериш, вирус ДНК/РНКни ажратиб олиш, реакцион аралашмани тайёрлаш ва ПЦР ўтказиш, ПЦР натижаларини аниқлаш ва материалларни дезинфекция қилиш ускунасини жамлаган.

Клиник тиббиётда ПЦР-ташхис қўйиш шунингдек инфекцион касалликлар клиникаси, урогинекология, неонатология, қон хизмати, фтизиатрия ва пульмонология каби йўналишларда ҳам энг зарур усуллардан бири ҳисобланади.

Алоҳида таъкидланишича, мазкур услуб ёрдамида нафақат диагноз қўйиш, балки қўзғатувчининг турини, яъни штаммини  аниқлаш мумкин.

Етказиб берилаётган ускуна ва тест-тизимларнинг умумий баҳоси қарийб 70 минг еврони ташкил қилади.

Ускуналарнинг Ўзбекистонга етиб келиши май ойининг бошида кутилмоқда.