Зангиотада ЙТҲ натижасида пиёда вафот этди

Ҳолат юзасидан Жиноят кодексининг 266-моддаси ва 117-моддаси билан жиноят иши қўзғатилган.

Фото: Тергов департаменти

2020 йил 17 апрель куни соат 23:50ларда, номаълум ҳайдовчи номаълум автомашинасида Тошкент вилояти Чиноз тумани ҳудудидан Тошкент шаҳар томон ҳаракатланиб, Зангиота тумани Туркистон маҳалласидан ўтган М-39 йўли 818-километри автомобиль қатнов қисмида 33 ёшли фуқаро В.Р.ни уриб юбориб, ҳодиса жойидан яширинган.

Ўзбекистон Республикаси ИИВ ҳузуридаги Тергов департаменти хабарига кўра, ушбу йўл-транспорт ҳодисаси оқибатида пиёда В.Р. ҳодиса бўлган жойида вафот этган.

Ҳолат юзасидан номаълум шахсга нисбатан Зангиота тумани ИИБ ҳузуридаги Тергов бўлими томонидан Ўзбекистон Республикаси Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш) ва 117-моддаси 2-қисми (Хавф остида қолдириш) билан жиноят иши қўзғатилган.

Дастлабки тергов жараёнида олиб борилган тергов-тезкор ҳаракатлари натижасида ушбу йўл-транспорт ҳодисасини Тошкент шаҳар Юнусобод туманида яшовчи 26 ёшли А.Ш. ўз бошқарувидаги Nexia русумли автомашинасида содир этганлиги аниқланиб, процессуал тартибда ушланган.