«Бунинг охири вой бўлиши мумкин». Бош санитария инспектори тана ҳароратини номигагина ўлчаш ва ниқобни нотўғри тақиш ҳолатлари ҳақида гапирди

 АОКА штабида Бош давлат санитария инспектори Нурмат Отабеков иштирокида брифинг бўлиб ўтди.

Брифингда муҳим савол ва мурожаатлар юзасидан жавоб қайтарилди.

Нурмат Отабековнинг сўзларига кўра, коронавирус организмга ияк ва бўйин орқали юқмайди.

“Коронавирус организмга бурун, оғиз ва кўз шиллиқ пардаси орқали киради ва ривожланади. Дока ниқоб билан буруннинг, оғизнинг, бир пайтнинг ўзида иккаласининг ёпилмагани коронавирус қўзғатувчисининг организмга киришига йўл очиб беради. 

Агар сиз дока ниқобни тўғри тақиб юрган бўлсангиз, ниқобни нотўғри тақиб юрган одамга албатта эътироз билдиринг. Негаки, ушбу шахс нафақат ўзининг, балки, сизнинг саломатлигингизга ҳам хавф солади. Унинг эса бунга ҳаққи йўқ”, - дейди у.

Шу билан бирга, Нурмат Отабеков супермаркет ва бозорларга кириш жойидаги термометрлар натижасининг статистикаси олиб борилаётгани ҳақидаги саволга жавоб қайтарди.

“Бундай маълумотларни жойларда йиғиш, жамлаш, юқори ташкилотларга узатиш, туман, шаҳар, вилоятлар ва республика даражасида шакллантириш ҳамда таҳлил қилиш жуда мушкул жараён. Ҳарорати кўтарилган шахсларнинг нечтаси шифохонага борганлигини суриштириш ва аниқлашнинг имконияти ҳам йўқ.

Асосий мақсад — тана ҳарорати кўтарилганларнинг сонини санаш эмас, балки уларни касаллик манбаи сифатида бошқалардан алоҳидалаш, бир пайтнинг ўзида кўпроқ одамлар билан мулоқотда бўлишига йўл қўймаслик.

Афсуски, айрим жойларда бу ишлар номигагина қилиняпти, ҳарорати паст ёки баланд эканлигига қаралмаяпти. Бунинг эса охири вой бўлиши мумкин. Коронавирусдан қутулдик, деган давлатларда, касаллик эпидемик авжининг янги тўлқини пайдо бўлаётгани ҳаммамизнинг кўзимизни очиши керак”, - деди у.