Афғонистондаги зилзила кучи Ўзбекистонда сезилди. Бу кун давомида иккинчиси

16 июнь куни Тошкент вақти билан соат 14:21да Афғонистонда юз берган зилзила Ўзбекистон ҳудудида ҳам сезилди.

Фавқулодда вазиятлар вазирлиги Республика сейсмопрогностик мониторинг маркази хабарига кўра, зилзила ўчоғи Афғонистонда, Тошкентгача масофа 524 километр жанубий-шарқий йўналишда жойлашган бўлиб, магнитуда — 5,3, чуқурлик — 214 километр.

Ўзбекистон ҳудудида зилзиланинг кучи 2 баллни ташкил қилган.

Зилзила Ўзбекистон ҳудудида:

• Тошкент: 524 километр, 2 балл;
• Наманган: 482 километр, 2 балл;
• Андижон: 471 километр, 2 балл;
• Фарғона: 416 километр, 2 балл;
• Гулистон: 455 километр, 2 балл;
• Жиззах: 458 километр, 2 балл;
• Самарқанд: 469 километр, 2 балл;
• Термиз: 319 километр, 2 балл;
• Қарши: 501 километр, 2 балл;
• Навоий: 603 километр, 2 балл.

«Ўзбекистоннинг бошқа ҳудудларида ер силкиниши қайд этилмади. Талафотлар ва жабрланганлар тўғрисида маълумот келиб тушмади», дейилади хабарда.

Бундан аввалроқ бугун Тошкент вақти билан соат 6:30да Тожикистонда рўй берган 5,5 балли зилзила кучи Ўзбекистоннинг турли ҳудудларида сезилгани хабар қилинганди.