Илон Маск илк бор дунёнинг энг бадавлат инсонлари бешталигига кирди

Илон Маск 74 млрд доллар бойлиги билан илк бор дунёнинг энг бадавлат инсонлари бешталигидан ўрин олди. Бунга Telsa акциялари нархи қимматлашгани сабаб бўлди.

Фото: Zuma / TASS

Tesla ва SpaceX компаниялари асосчиси Илон Маск дунёнинг энг бадавлат инсонлари бешталигига кирди. Бундан Forbes Real-Time рейтинги дарак бермоқда. Душанба куни Tesla акциялари савдоси натижаларига кўра, Маскнинг бойлиги 74,2 млрд доллар деб баҳоланди. У олтинчи ўринда турган Мукеш Амбанини 1,3 млрд долларга ортда қолдирди.

Маск йил бошида дунёнинг энг бой кишилари рейтингида 37-ўринда эди, дея қайд этади Forbes. Йил бошидан буён Tesla акциялари нархи 300 фоизга кўтарилди. Tesla ҳозирда нафақат дунёдаги энг қиммат автокомпания, балки Ford, Ferrari, General Motors ва BMW компанияларининг биргаликдаги нархидан ҳам қимматроқ туради.

Йилнинг биринчи чорагида Tesla 103 000 дона машина ишлаб чиқарган, яқин вақтгача дунёнинг энг қиммат автокомпанияси бўлиб келган Toyota эса 2,4 млн дона автомобил ишлаб чиқарган.