Блокаторларнинг коронавирусдан ҳимоя қилишини исботловчи маълумотлар адабиётларда йўқ. Шунингдек, уни тақиш ниқоб ва антисептикнинг ўрнини боса олмайди. Бу ҳақда бош давлат санитария инспектори Нурмат Отабеков маълум қилди.
Бугун, 27 июль куни АОКАда ўтказилган брифингда Нурмат Отабеков фуқаролардан келган қатор саволларга жавоб берар экан, блокатор бейжикларнинг қай даражада ишончли ва вируслардан ҳимоялаш хусусиятига эгалиги борасида ҳам муносабат билдирди.
«Дастлаб, вирус блокаторларни япониялик олимлар ишлаб чиқаришган. Уларнинг вазифаси инсон атрофидаги ҳавони зарарсизлантириб туриш ҳисобланади.
Бейжик ичидаги картрижга жойлаштирилган фаол модда - хлор диоксидини сақлайди. Аммо бу модда кишида аллергия, тошмалар бериши мумкин.
Шунингдек, Россия, Болтиқбўйи олимлари ҳам вирус блокаторларнинг самараси паст деган фикрда. Айниқса, очиқ ҳавода ёки елвизакда бўлган пайтда унинг самараси қарийб нолга тенг бўлиши мумкин.
Мазкур блокаторларнинг коронавирусдан ҳимоя қилишини исботловчи маълумотлар адабиётларда йўқ. Блокатор тақиш ниқоб ва антисептикнинг ўрнини боса олмайди», дея Отабековнинг сўзларини келтирмоқда Kun.uz мухбири.
