АҚШда коронавирусни сўлак намунаси бўйича аниқлаш усули ишлаб чиқилди

Фото: TASS / EPA

АҚШ ҳукумати сўлак намунаси бўйича коронавирусни аниқловчи янги тестни қўллашга рухсат берди. Бунда бурун-ҳалқумдан суртма олиш талаб этилмайди.

Янги тест SalivaDirect деб номланиб, Йел университети олимлари томонидан ишлаб чиқилган. Таҳлилни ўтказиш учун махсус воситалар талаб этилмайди, сўлакни исталган махсус идишга йиғиш ва тест жавобини АҚШдаги кўплаб лабораторияларда билиш мумкин. CNN телеканали маълумотларига кўра, таҳлил жавобини 3 соатдан камроқ вақтда олиш мумкин. SalivaDirect тести нархи лабораторияларда 10 долларга яқинни ташкил қилиши мумкин, бу АҚШдаги бошқа мавжуд тестлардан анча арзонроқдир.

АҚШ соғлиқни сақлаш ва ижтимоий хизматлар вазири ёрдамчиси Бретт Жируарнинг таъкидлашича, бу яна битта новаторлик ечими бўлиб, у коронавирусга тестни ўтказиш учун ресурсларга эҳтиёжни камайтиришга ёрдам беради. Бундан ташқари, бундай усул таҳлилни ўтказаётган мутахассисларнинг инфекцияга чалиниши хавфини камайтиради.

Тайёрлаган: Шуҳрат Раҳимов

#АҚШ #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.