Туркияда коронавирус яна авж олди. Барча ҳудудларда ниқоб тақиш мажбурий қилинди

Туркия ҳукумати 8 сентябрь куни коронавирус профилактикаси чоралари қатъийлаштирилгани ҳақида эълон қилди. Мамлакатнинг барча ҳудудларида жамоат жойларида (жумладан жамоат пляжларида, аммо меҳмонхоналар пляжларида эмас) ниқобда юриш мажбурий бўлди. Кафеларда, ресторанлар ва меҳмонхоналарда тунги концертлар бекор қилинди, жамоат транспортида ижтимоий масофа сақлаш талаб этилади. Қоидабузарлар учун маъмурий жавобгарлик кўзда тутилган.

Туркияда янги профилактика чоралари эълон қилинган кунда 1761та янги касалланиш ҳолати қайд этилган — бу май ойидан буён рекорд кўрсаткич эди, ўшанда мамлакатда коронавируснинг биринчи тўлқини пасайишни бошлаганди. Бундан ташқари, Туркия соғлиқни сақлаш вазири Фахриддин Хўжанинг маълум қилишича, мамлакатда коронавируснинг оғир даражасига чалинганлар сони ўсмоқда. «Бу вазиятни фақатгина санитар қоидаларига биргаликда амал қилган ҳолда тўхтатишимиз мумкин», — дея ёзган ушбу амалдор твиттерида.

Вазир ўтган ҳафтада Туркияда касалланиш ҳолатлари ўса бошлаганини қайд этган (шу билан бирга у бу ҳолатни эпидемиянинг иккинчи тўлқини эмас, биринчи тўлқиннинг иккинчи чўққиси деб атаганди). Бу чўққи август ойида бошланган. Ўшанда у бу вазият юзага келишига фуқаролар профилактика чораларига риоя этмаётганини сабаб сифатида келтирганди. «Биз афсус билан кузатаяпмизки, дам олиш жойларида, кўнгилочар масканларда, бозорларда ва маросимларда хавфсизлик чораларига етарлича эътибор қаратилмаяпти», — деганди вазир.

9 сентябрь ҳолатига кўра, Туркияда коронавирусдан даволанаётганлар сони 30 мингдан ошиқ. Шу вақтгача қайд этилган жами ҳолатлар сони 284 мингдан ошган, 6837 киши вафот этган.