Эрдўған: Жаноб Макрон, сен ҳали мен билан кўп муаммоларга дуч келасан

Эрдўған Франция билан зиддиятлар давом этаётган Сурия, Ўрта ер денгизи ва Ливия масалалари ҳақида тўхталди.

«Биз жанубдаги коалиция кучлари билан курашмоқдамиз. Кўряпсизми, террористик давлат тузишга уриниш бор. Қаерда? Сурияда.

Бошқа томондан, Ливияда, афсуски, Ҳафтар ва Абу-Даби маъмурияти томонидан қўллаб-қувватланадиган «Вагнер» номли ёлланма қуролли кучлар мавжуд. Улар билан бир қаторида Франция ҳам доимо кун тартибида. Мен исмини келтиришни истамасдим, аммо у мен билан кўп ўчакишяпти. «Бизнинг турк миллати билан эмас, Эрдўған билан муаммомиз бор», дейди. Жаноб Макрон, сен ҳали мен билан кўп муаммоларга дуч келасан.

Аввало, турк миллати билан ўчакишма, Туркия билан ўчакишма. Африканинг тарихи Франциянинг тарихидир. Жазоирда бир миллион кишини ўлдирган сизсиз.

Сиз бизга инсонийликдан дарс беролмайсиз, аввало, буни билиб қўйинг. Мен буни шахсан унинг ўзига айтдим. Менга қара, дедим, сенинг тарихдан билиминг йўқ, сен буларни ўрганишинг лозим. Биз эса Африкада бирор инсоннинг бурнини қонатмадик.

Коронавирус жараёни давомида биз Африка ва бутун дунё бўйлаб 150га яқин давлатга ёрдам бердик.

Эй Макрон, сен нима қилдинг? Ҳозир тирсак билан кўришаётганлар нима иш қилишди? Сен шуни айт», дейди Эрдўған.

«Ҳеч қандай тўнтариш қонуний ва маъсум эмас»
Эрдўған нутқининг тўнтаришлар билан боғлиқ қисмида «Туркияда амалга оширилган ёки ташаббус қилинган ҳеч бир давлат тўнтариши миллий, қонуний ва маъсум бўлмагани» ҳақида гапирди. Эрдўған 2016 йил 15 июлдаги давлат тўнтаришига уриниш ҳақида тўхталган.

«Ўша кеча аён бўлганидек, агар миллат оёққа қалқса, тўнтариш қилишга уринганларнинг на қуроли, на замбараклари, на оммавий ахборот воситалари ва на уларнинг халқаро дастаклари бир ишга ярайди.

Ҳар бир тўнтариш аввалги тўнтаришнинг нуқсонларини, чала ва кемтикларини, амалга ошира олинмаган жиҳатларини якунлаб қўйиш учун уюштирилган. Туркияни ўз ҳолига ташлаб қўйиб бўлмас даражада муҳим жой деб таърифлаганлар давлатимизни ўз васийлари қўли билан бошқариш учун ҳар қандай усулни синаб кўришди.

Халқимиз 15 июль куни кўрсатган жасорати ва қаҳрамонлиги, ўзининг кучли позицияси орқали ўтмишдаги ифлос сценарийлар билан ҳисоб-китоб қилиб олди», деган у.

Симпозиумда Адлия вазири Абдулҳамит Гул ва MHP (Миллиятчи ҳаракат партияси) раиси Девлет Боғчали ҳам нутқ сўзлаган.

Боғчали: Буни Макрон билиши, Микотакис эса эшитиши керак
Давлат Боғчали ҳам ушбу симпозиумда сўз олди ва Ўрта ер денгизининг шарқий қисми ҳамда Греция билан юзага келган кескинлик ҳақида гапирди.

«Бизнинг сабр-тоқатимиз ва миллий кучимиз қуруқлик ва денгиз томондан қанчалик синовдан ўтказилмасин, бу миллат торайиб бораётган душманлик доирасини ёриб ташлайди.

Бизнинг туркий-исломий ахлоқ билан зийнатланган, марҳамат ва шаҳодат билан юксалган азиз халқимиз ўз бошини офатлардан қаҳрамонлик билан кўтаради. Худди «Ё истиқлол, ё ўлим» деган ғозий Мустафо Камол Отатурк сингари у ҳеч қандай таҳдидга эътибор бермайди. Халқ иродаси миллий бирдамлик ва биродарлик кучи билан васийликнинг ҳимоя панжаларини ағдаради.

Айниқса, Макрон буни билиши керак, Микотакис эса эшитиши керак, минтақавий ва глобал хиёнат билан шуғулланаётганлар бу ирода кучини ҳеч қачон унутмасликлари керак. Бу халқ фақат Аллоҳнинг иродасига бўйсунади. Бундан бошқа ҳар қандай ҳимоя ёки васийлик йўқ қилинади», деди у.

Адлия вазири: 12 сентябрь изларининг катта қисми ўчирилди
Адлия вазири Абдулҳамит Гул ўз нутқида 12 сентябрь изларининг катта қисми ўчирилганини айтди.

«Президентимиз раҳбарлигида ҳуқуқ ва эркинликлар ажралмас ва қайтариб бўлмайдиган тарзда бизнинг ҳуқуқий тартибимизда мужассам этилган. Ушбу даврда амалга оширилган барча ислоҳотлар кучли демократия мақсадида миллат номидан ва миллат билан бирга амалга оширилди.

Барча фуқароларнинг овози, ранглари ва илдизларини қамраб оладиган, бегона қилмай бирлаштирадиган бу жараён ўтмишни рад этиш ва инкор этиш сиёсатига қарши бамисоли бир инқилобдир», деган у.