Трампга заҳарли модда солинган мактуб Канададан жўнатилгани аниқланди

АҚШ президенти Дональд Трампга ичида рицин заҳарли моддаси бўлган мактуб Канададан жўнатилган. Бу ҳақда The New York Times нашри хабар берди.

Фото: Reuters

Ҳуқуқ-тартибот идоралари вакилининг таъкидлашича, бундай мактублар Техас штатидаги ҳукумат муассасаларига ҳам жўнатилган. Айни вақтда терговчилар почта орқали бошқа шундай мактублар жўнатилганини текширишмоқда.

Маълум қилинишича, тергов мактублар Канададан жўнатилган деб ҳисобламоқда ва бунда бир аёл гумон қилиннмоқда.

Ҳозирча терговчилар заҳарли мактуб ва халқаро террорчилик ташкилотлари ўртасида алоқа борлигини аниқлашмаган. Бироқ таъкидланишича, тергов эндигина бошланғич босқичда ва версиялардан бирортасини истисно қилиб бўлмайди.

Аввалроқ маълум қилинганидек, жорий ҳафтада АҚШ ҳуқуқ-тартибот идоралари Трамп номига жўнатилган заҳарли моддали мактубни ушлаб қолишган.

Рицин юқори даражадаги заҳар бўлиб, ўтмишда ундан террорчилар бир неча марта фойдаланишган.

Бу Оқ уй ходимлари хавфли жўнатмаларни қўлга киритаётган биринчи ҳодиса эмас. 2018 йилда АҚШ ҳарбий-денгиз кучларининг собиқ ходими Оқ уй ва Пентагонга рицинли мактублар жўнатишда айбланган. Бундай заҳарли модда солинган мактублар АҚШнинг собиқ президенти Барак Обамага ҳам жўнатилган.