Британияда ҳаводаги қурумдан олмос ишлаб чиқилди

Sky News нашрининг хабар беришича, Британиянинг Ecotricity компанияси ҳаводан углеродни сўриб олиб, уни олмосларга айлантириш усулини ишлаб чиқди. Компания бунинг учун тикланувчи энергия манбаларидан фойдаланган.

Олимлар жамоаси ҳаводаги қурумдан олмос олиш техникасини ишлаб чиқишига ва бундай йўл билан олинган олмослар физик ва кимёвий жиҳатдан табиий олмослар билан бир хиллигига ишонч ҳосил қилишига 5 йилдан кўпроқ вақт талаб этилди. Олимларнинг таъкидлашича, ушбу олмос дунёдаги биринчи экологик соф олмос бўлиб, унинг олиниши учун ҳаводан углеродни сўриб олувчи қурилма қўлланади.  

“Фикримча, бу XXI аср учун идеал соҳадир. У бизда ҳаддан кўп бўлган нарса – ҳаводаги карбонат ангидридни олиб, уни бизга ёқадиган нарса – олмосга айлантиради”, деб таъкидлаб ўтган Ecotricity компанияси асосчиси Дейл Винс.

Олимларнинг таъкидлашича, олмос олишнинг бу усули сайёрамизга зиён етказувчи анъанавий олмос қазиб олиш усулига чақириқ ҳисобланади. Уларнинг айтишича, эндиликда олмос қидириш учун фазодан кўриниб турадиган улкан ўралар қазишга ҳожат бўлмайди. 

Халқаро геммологик институт томонидан сертификатлаштирилган янги олмосни тайёрлаш учун 2 ҳафтача вақт кетади.

Ушбу олмосларга 2021 йил бошидан буюртма бериш мумкин бўлади.