«Мурожаатлар билан ишловчи 34 ходим COVID-19га чалинган» — Бош прокуратура танқидий мақолага изоҳ берди

Kun.uz 9 ноябрь куни «Бош прокуратура 7 ой ичида 14 мингдан ортиқ мурожаатни қабул қилмаган. Уларнинг тақдири нима бўлади?» сарлавҳали танқидий мақола эълон қилган эди.

Мақолада Ўзбекистон Бош прокуратурасига 2020 йилнинг 2 апрелидан 31 октябрга қадар почта орқали турли ҳудудларидан келиб тушган 14 310 та, чет мамлакатлардан келган 211 та мурожаат қабул қилинмасдан ортга қайтариб юборилгани ҳақида сўз боради.

Мақола эълон қилингач, Бош прокуратура вакиллари масалага ойдинлик киритиш мақсадида Kun.uz мухбирини Мурожаатлар билан ишлаш бошқармасига таклиф қилишди.

Мурожаатлар билан ишлаш бошқармаси бошлиғининг ўринбосари Анвар Ихтиёровнинг маълум қилишича, ҳақиқатан ҳам Вазирлар Маҳкамасининг 2020 йил 23 мартдаги «Коронавирус инфекцияси тарқалишига қарши қўшимча чора-тадбирлар тўғрисида»ги 176-сонли қарор талабларидан келиб чиқиб, аҳолининг санитария-эпидемиологик осойишталиги ва хавфсизлигини таъминлаш, коронавирус инфекцияси тарқалишининг олдини олиш мақсадида прокуратура органларида қоғоз кўринишидаги ҳужжатларнинг қабул қилиниши вақтинча тўхтатилган ҳамда бу ҳақда 2020 йил 2 апрель куни барча вазирлик ва идоралар билан бир қаторда биринчи навбатда почта алоқа хизматига расмий хабар берилган.

Бундан ташқари, Қорақалпоғистон Республикаси, вилоятлар ва Тошкент шаҳар прокуратуралари ҳамда туман-шаҳар прокуратураларида, шунингдек, Иқтисодий жиноятларга қарши курашиш департаменти ва Мажбурий ижро бюросида ҳам мурожаатларни телефон орқали қабул қилиш ташкиллаштирилган ва бу ҳақда 24 март куни Бош прокуратуранинг веб-сайтида эълон қилинган.

«Лекин мазкур чекловлардан келиб чиқиб, аҳоли ҳамда жисмоний ва юридик шахсларнинг мурожаатларини «1007» ишонч телефони ва pm.gov.uz интернет сайти орқали қабул қилиш икки баробар кучайтирилди.

Пандемия даврини ҳам қўшиб ҳисоблаганда, жорий йилнинг 10 ойи мобайнида прокуратура органларига келиб тушган мурожаатлар сони 315 128 тани ташкил этган. Мурожаатларнинг 165 455 таси бевосита прокуратура органларида ҳал этилиб, шундан 32 294 таси қаноатлантирилган, 3 303 таси рад қилинган бўлса, 129 858 таси бўйича тушунтириш берилган. Кўрилган чоралар натижасида 29 415 нафар шахснинг ҳуқуқлари прокурорлар томонидан тикланган.

Ўзбекистон Республикаси Президенти Виртуал ва Халқ қабулхоналаридан (pm.gov.uz) прокуратура органларига юборилган 50 929 та мурожаатдан 45 054 таси кўриб чиқилиб, шундан 20 112 таси қаноатлантирилган, 24 339 таси бўйича тушунтиришлар берилган, 603 таси рад қилинган, 810 таси кўрмасдан қолдирилган ва 1 минг 946 таси тугатилган.

Шунингдек, Бош прокуратура Мурожаатлар билан ишлаш бошқармаси таркибидаги «Мурожаатларни телефон орқали қабул қилиш маркази»га (1007 колл-маркази) 10 ой давомида аҳолидан жами 87 889 та мурожаат келиб тушган. Уларнинг 15 772 таси қаноатлантирилган, 69 488 таси бўйича тушунтириш берилган ва 1 813 таси рад қилинган, 687 таси кўрмасдан қолдирилган. Баъзида айрим фуқаролар 1007 рақамига телефон қилиб, 40-50 дақиқа гапиришади, бунинг натижасида бошқаларнинг сабри етмасдан ўчириб қўяди. Кейин қўнғироқ қилганида иложсиз бошқа навбатга тушади.

Прокуратура органлари ходимлари томонидан республика бўйича 153 377 нафар фуқаро ва юридик шахсларнинг вакиллари қабул қилинган. Уларнинг 59 753 нафари прокурорлар томонидан, 36 789 нафари прокурор ўринбосарлари томонидан қабул қилинган.

Шахсан бош прокурор томонидан 122 нафар, Бош прокурор ўринбосарлари томонидан 1 716 нафар жисмоний ва юридик шахс сайёр қабуллар орқали қабул қилинган.

Прокуратура органлари пандемия даврида ҳам мурожаатларни қабул қилишни тўхтатмаган, доимий фаолиятини олиб борган. Ҳар бир фуқаронинг муаммосини ўзининг муаммосидек қабул қилишга ҳаракат қилиб келган», – дейди Анвар Ихтиёров.

Бош прокуратура вакилининг маълум қилишича, ҳар бир фуқаронинг мурожаати қабул қилинади. Агар қандайдир техник муаммо содир бўлиб узилиб қолса, яна қайтадан уриниб кўриш мумкин. Бунга ҳеч қандай чекловлар қўйилмаган.

Мурожаатлар билан ишлаш бошқармаси бошлиғи ўринбосари Анвар Ихтиёров 2020 йил 30 октябрдан почта орқали ҳам хатларни қабул қилиш тикланганини, агар фуқароларни пандемия вақтида юборган мурожаатлари ҳал қилинмаган бўлса, уларни бемалол қайта юборишлари мумкинлигини таъкидлади.

«Аввал хатлар келиши билан ижрога қаратилса, ҳозирда 1 кунгача кварц қути ичида сақланиб, сўнгра сканер қилинган ҳолда ўрганишга берилади», – деди у.

Маълум қилинишича, карантин вақтида қабул қилинмай қолиб кетган хатларнинг кўпчилиги ҳудудий прокурорлар ва Бош прокуратура раҳбарларининг сайёр қабулларида ёки фуқаролар томонидан электрон тарзда юборилганидан сўнг ҳал қилинган бўлиши керак.

Бундан ташқари, пандемия даврида Бош прокуратуранинг бевосита келиб тушган ҳужжатларни қабул қилиш ҳамда тақсимлаш фаолиятини амалга оширувчи тармоғининг 34 нафар ходими COVID-19 билан касаллангани ва уларнинг касалланиш манбасини аниқлаш имкони бўлмагани маълум қилинди.

Фаррух Абсаттаров,
Тасвирчи ва монтаж устаси –Дониёр Яқубов