Перуда президент, конгресс раиси ва вице-президент ўринлари бўш қолмоқда.
Конгресс Росио Силва Сантистебан номзодини президентликка маъқулламаганидан сўнг Перуда ҳокимият бўшлиғи пайдо бўлди.
Якшанба куни Перунинг вақтинчалик президенти Мануэл Мерино истеъфога чиқди. У ўтган ҳафтада коррупцияда айбланиб импичмент эълон қилинган президент Мартин Вискарра ўрнини эгаллаганди.
Мерино ўзига қарши ўтказилган норозилик намойишларидан кейин истеъфога чиқишга мажбур бўлди. У полициянинг намойишларни тарқатишда қилган кескин ҳаракатларига бефарқлик қилганликда айбланмоқда.
Шу билан бирга, Перуда конгресс раиси ва вице-президент ўринлари ҳам бўш қолмоқда.
“Инқироздан чиқиш уни вужудга келтирган конгресс аъзолари қўлида”, – деб изоҳлади вазиятни собиқ иқтисодиёт вазири Мария Антониэта Алва.
Перуда президент сайлови 2021 йил апрелда бўлиб ўтиши режалаштирилган.