Кичик астероид Ер ёнидан рекорд даражада яқин масофада учиб ўтгани маълум қилинди 

Ушбу масофа бор-йўғи 373 кмни ташкил қилган. Халқаро коинот станцияси ҳаракатланадиган орбита баландлиги эса 410 кмни ташкил қилади.

N+1 нашрининг ёзишича, 2020 VT4 деб номланган астероид 14 ноябрда Ҳавайидаги ATLAS тизими телескоплари ёрдамида қайд қилинган. Унинг ўлчами 5-10 метрни ташкил қилади.

Newly-discovered asteroid A10sHcN approached Earth yesterday, passing only a few hundred miles above the South Pacific Ocean. This encounter shortened its orbit, ensuring that this Earth-crosser will make more frequent close approaches.https://t.co/TmkzojIzPf pic.twitter.com/XrnKiiGTyJ

— Tony Dunn (@tony873004) November 14, 2020

Олинган маълумотларни ўрганиш астероиднинг биринчи суратлари у Ерга яқинлашгандан 15 соат ўтиб олинганини кўрсатган. Астероид сайёрамиз ёнидан энг минимал масофада Тошкент вақти билан 13 ноябр соат 22:20да учиб ўтган. Бу вақтда само жисми Тинч океанининг жанубий қисми устидан ўтган ва Ердан +3 юлдуз катталигидаги митти нуқта каби кўринган.    

Само жисмларининг Ер ёнидан минимал узоқликда учиб ўтиши бўйича аввалги рекорд 2020 йил августида қайд қилинганди. Ўшанда диаметри 3-6 метрни ташкил қилувчи 2020 QG астероиди сайёрамиз ёнидан 3 минг км нарида учиб ўтган. Мутахассисларнинг таъкидлашича, ушбу икки астероид ҳам Ерга зиён етказа олмасди, чунки бундай кичик ўлчамлар билан улар атмосферада ёниб кетган бўларди.

Астрономларнинг таъкидлашича, 2020 VT4’нинг Ерга яқинлашиши унинг орбитасига таъсир кўрсатган. Ернинг тортиш кучи таъсири остида астероид Қуёш атрофидаги 549 кунлик орбитадан 315 кунлик орбитага ўтган. Ҳисоб-китобларга кўра, ушбу астероид Ер ёнидан келаси сафар 2052 йил ноябрида 3 млн километр нарида учиб ўтади.