Сизда ажойиб стартап ғоя бор, аммо маблағ йўқми?

Ёшлар ишлари агентлиги ва БМТнинг “Фарғона водийси ёшларининг ижтимоий уйғунлиги” қўшма лойиҳаси Андижон, Наманган ва Фарғона вилоятларидаги ёшлар орасида “JustStart” ҳудудий стартаплар учун акселерация дастурини амалга оширишни эълон қилади.

Дастур Фарғона водийсидаги 16 ёшдан 30 ёшгача бўлган ёшларнинг ўз бизнесларини бошлаш ва тадбиркорлик кўникмаларини ривожлантиришларида назарий ва амалий ёрдам кўрсатишга мўлжалланган бўлиб, унда етакчи бизнес тренерлар ва экспертлар ёрдамида бизнес ғоядан сармоягача бўлган босқичларнинг барча сир-асрорлари ўргатилади. Иштирокчиларда ахборот технологиялари, фан, экология, қишлоқ хўжалиги, хотин-қизлар тадбиркорлиги каби турли соҳаларни ривожлантириш бўйича керакли билим олиш имкони пайдо бўлади. 

Ушбу дастур доирасида жамоалар орасидан энг яхши деб топилган 10 та лойиҳага 5000 АҚШ доллари миқдорида беғараз грант тақдим этилади.

Дастур тўрт ой давом этади ва шу муддат ичида иштирокчиларга муайян ғояни яратишдан тортиб стартап лойиҳасини ишлаб чиқиш, ҳамда бошланғич маблағни (кичик грантни) олгунга қадар босқичлардан ўтиш имконияти берилади.

Лойиҳа давомида жамоалар юртимиздаги турли муассасалар ва ишлаб чиқариш корхоналарига онлайн ташриф буюриш учун ажойиб имкониятга эга бўладилар. Бундан ташқари, улар илғор тадбиркорлар, малакали менторлар ва етакчи мутахассислардан онлайн маслаҳат ва фойдали фикр-мулоҳазалар олишади. Бундай қимматли маслаҳатлар ёрдамида эса жамоаларнинг ўз бизнес ғояларини амалга ошириш ва кичик грантларга эга бўлиш имкониятлари янада ортади.

Кўплаб талабларга биноан танловда иштирок этиш учун аризалар 23 ноябрь соат 23:23 гача www.juststart.uz веб-сайтида қабул қилинади. Унда фақат Фарғона водийси (Андижон, Фарғона ва Наманган вилоятлари шаҳарлари ва туманлари) да яшовчи ёшлар иштирок этишлари мумкин. Дастурда қандай иштирок этиш, лойиҳани танлаш мезонлари ва иштирокчиларга қўйиладиган талаблар тўғрисидаги ахборотни ушбу ҳаволадан олишингиз мумкин.

Инстаграм: @juststart.uz

Фаcебоок: juststart.uz

Телеграм: juststart

Веб-сайт: juststart.uz

Ёшлар ишлари агентлиги матбуот хизмати