АҚШ Туркия С-400 борасидаги қарорини қайта кўриб чиқишига умид билдирди

АҚШнинг НАТОдаги вакилининг сўзларига кўра, Вашингтон Туркия “хатога йўл қўйганини англаб, ўз позициясини ўзгартиришини кутмоқда”.

Фото: РИА Новости

АҚШ Анқара Россиянинг С-400 мажмуаларини сотиб олганида ноҳақ бўлганлигини тушуниб етиши ва бу масала бўйича позициясини қайта кўриб чиқишига умид қилмоқда. Бу ҳақда АҚШнинг НАТОдаги доимий вакили Кей Бейли Хатчисон айтди.

“Биз Туркия С-400дан фойдаланишни бошлагунига қадар бу ҳаракатининг эҳтимолий оқибатларини тушуниб етишига умид қилмоқдамиз”, – деди у.

Хатчисоннинг сўзларига кўра, Вашингтон Туркия “хатога йўл қўйганини англаб, ўз позициясини ўзгартиришини кутмоқда”.

АҚШ Туркиянинг С-400 мажмуаларини сотиб олиши борасида бир неча бор хавотир билдирган ва бу фикрдан воз кечишни талаб қилганди.

Туркия ўтган йилнинг июлида С-400 мажмуаларини сотиб олгач, Вашингтон Анқарани F-35A қирувчи самолётларини ишлаб чиқариш дастуридан чиқариб юборди.