АҚШда Трамп тасвирланган 1 долларлик танга чиқарилади

АҚШнинг 250 йиллиги шарафига мамлакат зарбхонаси амалдаги президент Доналд Трамп тасвири туширилган 1 долларлик можароли тангани чиқаради. Independent нашрининг ёзишича, зарб қилиш учун танланган дизайн АҚШ Тасвирий санъат комиссияси кенгаши томонидан тавсия этилмаган.

«Ғазначилик котиби сифатида менда фақат иккита мажбурият бор: танганинг қаеридадир «In God We Trust» (Биз Худога ишонамиз) деган ёзуви бўлиши ва унда тирик одам тасвирланмаслиги керак. Аммо 150 йиллик нишонланганида Калвин Кулиж тасвири туширилган танга чиқарилган эди, демак, биз тангаларга тирик одамлар тасвирини жойлаштиришимиз мумкин», деди ғазначилик котиби Скотт Бессент.

Кулиж тасвирланган эсдалик тангаси 1926 йилда, у президентлик даврида, АҚШнинг 150 йиллиги муносабати билан чиқарилган. Бу тангалар баҳс-мунозараларга сабаб бўлган ва уларнинг аксарияти кейинчалик эритиб юборилган. Гап шундаки, қоидаларга кўра, Америка пулларида тирик одамни тасвирлаш мумкин эмас.

Бироқ АҚШ маъмурияти Трамп тасвири 2020 йилда қабул қилинган «Муомаладаги ва коллекция қийматига эга тангалар дизайнини қайта ишлаш тўғрисида»ги қонунга мувофиқ 1 долларлик тангаларда акс эттирилиши мумкинлигини таъкидламоқда. Бу қонун Бессентга 2026 йил январидан бошлаб бир йил давомида 1 долларлик танга чиқариш ваколатини беради.

Январь ойида Тасвирий санъат комиссияси 1 долларлик танганинг олд ва орқа томони дизайнининг бир нечта вариантини кўриб чиққан. Комиссия аъзолари дастлаб танганинг олд томонига Трампнинг профилдан туширилган портретини жойлаштиришни тавсия қилган эди.

Шу билан бирга, Америка қонунчилиги тирик президентларни тангада тасвирлашни тақиқлайди: портретни фақат инсон вафотидан икки йил ўтгач жойлаштириш мумкин. Бундан ташқари, юбилей тангаларини қайта дизайн қилиш тўғрисидаги махсус қонун танганинг орқа томонида ҳар қандай одамнинг портретидан фойдаланишни ман қилади.