ТИҚХММИ: Ўзбекистоннинг 2 та университети дунёнинг 2020 йилги «Яшил университетлари рейтинги»да муносиб ўрин эгаллади

Дунёда Олий таълим муассасалари рейтингини баҳоловчи кўплаб рейтинглар мавжуд бўлиб, улар қаторида Quacquarelli Symonds (QS), Times Higher Education (THE), Academic Ranking of World Universities (ARWU) рейтинглари етакчилик қилиб келмоқда. Шундай рейтинглардан яна бир халқаро эътироф этилган рейтинг Индонезия университети томонидан 2010 йилда таъсис этилган – «UI GreenMetric» рейтингидир. Ушбу рейтингнинг асосий мақсади университетларда чиқиндиларни қайта ишлаш, электр энергияси ва ичимлик сувидан оқилона фойдаланиш, атроф-муҳитга зарар етказмаслик, яшилликни борича асраб қолиш, лозим бўлса уларнинг сонини кўпайтиришга эътибор қаратаётган лидер университетларни қўллаб-қувватлаш ва уларнинг рейтингини тузишдан иборат.

2020 йил 7 декабр санасида Индонезия университети томонидан ҳар йилда эълон қилиб келинадиган рейтингнинг 2020 йилги UI GreenMetric дунё университетлари рейтинги натижалари ва тақдирлаш бўйича халқаро тадбир ўтказилди.

2020 йилда мазкур рейтингда дунёнинг 1000 га яқин энг илғор ва яшил университетлари иштирок этди. Қувонарлиси, бу йилги рейтингдан Ўзбекистон ОТМларидан Мирзо Улуғбек номидаги Ўзбекистон Миллий университети ҳамда Тошкент ирригация ва қишлоқ хўжалигини механизациялаш муҳандислари институтининг ҳам ўрин олган. Мазкур ОТМлар атроф-муҳитга кам зарар еткaзаётган, яшилликка бурканган университетлар қаторидан жой олиши Ўзбекистонда электр энергиясидан оқилона фойдаланиш, чиқиндиларни қайта ишлаш ва экологияга зарар етказмаслик ва ичимлик сувидан самарали фойдаланишга ундайди.

ТИҚХММ Институти Матбуот хизмати